O proxecto EBird naceu a máis de 7.000 quilómetros de Galicia, no Laboratorio de Ornitoloxía da Universidade de Cornell (Estados Unidos). Trátase dunha aplicación dispoñible en Android e IOS que permite explorar aves e sitios preto de ti, onde sexa que vaias, a fin de recompilar todas as observacións paxareiras do usuario nun mesmo dispositivo. Por exemplo, se estás en Pontevedra, a ferramenta recolle unha distancia de 30 quilómetros, dende onde é posible contemplar 124 especies e visitar as 237 localizacións de interese ornitolóxica nas proximidades da ubicación, segundo datos dos últimos sete días.
O máis interesante é que podes navegar a través dun mapa interactivo no que aparecen os rexistros das observacións de aves —segundo a época do ano e a localización—, seguindo unha taxonomía mundial completa baseada na Lista Clement das Aves do Mundo. Funciona, ao mesmo tempo, como unha ferramenta de ciencia cidadá, xa que reúne a comunidade de paxareiros máis grande do mundo e os datos proceden das actualizacións dos propios usuarios.
Unha das funcionalidades máis útiles é a creación de listas personalizadas onde recompilar os nomes científicos e comúns, ademais das características, dos paxaros observados.
Casos prácticos en Galicia
O Esteiro da Foz é unha paisaxe que se atopa entre Nigrán e Baiona, e convértese no paraíso ideal para os amantes das aves en calquera época do ano. Segundo os detalles desta ubicación na app eBird, 44 especies foron observadas nos últimos sete días. Entre elas, destacan o lavando real (Anas platyrhynchos), o fuselo de rabo negro (Limosa limosa), o pilro tridáctilo (Calidris alba), o mazarico real (Numenius arquata) ou o ibis eremita (Geronticus eremita) —unha cita extremadamente rara en Galicia—.
Mentres, no interior da provincia da Coruña, nas proximidades de Melide e Palas de Rei, aparece a Lagoa de Quintas, onde se contemplaron 13 especies na última semana. Algunhas das máis destacadas son a cerceta eurasiática (Anas crecca), a garza real (Ardea cinerea), o buxato común (Buteo buteo) e a estreliña riscada (Regulus ignicapilla).
Exemplar de ibis eremita en Galicia. Foto: Gustavo Ferreiro | SEO/BirdLife 
Lavando real (‘Anas platyrhynchos’). Foto: Wikimedia Commons 
Fuselo de rabo negro (‘Limosa limosa’). Foto: Wikimedia Commons 
Buxato común (‘Buteo buteo’). Foto: Wikimedia Commons Estreliña riscada (‘Regulus ignicapilla’). Foto: Wikimedia Commons
Así, eBird convértese na aplicación perfecta para quen adora a natureza, Galicia e, sobre todo, observar aves na paisaxe.
Coñece máis información sobre eBird na seguinte ligazón.
