A organización EuroBirdPortal (EBP) lanza un mapa interactivo no que é posible seguir a evolución dos movementos de todas as especies aviares rexistradas en Europa. A plataforma permite seleccionar entre múltiples parámetros de visualización: as ocorrencias, os trazos, as contas e a fenoloxía. Dende o espazo web explican que hai máis de 20 plataformas a nivel europeo que recollen observacións de aves —casuais e profesionais—, combinando áreas locais e transnacionais. “O EBP foi establecido para desbloquear todo este potencial a nivel europeo combinando os datos reunidos por todos os portais en liña que operan a través do continente”, expresan dende o EuroBirdPortal.
A diferenza dos seguimentos tradicionais e estruturados, estes espazos web céntranse en obter datos durante todo o ano grazas á actividade descentralizada dos ornitólogos afeccionados. Deste xeito, EBP pon o foco na ciencia cidadá como fonte de datos ornitolóxica. Aínda que os datos se recollen mediante protocolos habitualmente casuais, a enorme cantidade de información e a ampla cobertura xeográfica ofrecen un importante potencial investigador.
Ocorrencias, trazos, contas e fenoloxía
O visor interactivo de EuroBirdPortal amosa mapas animados e actualizados a diario con máis de 750 millóns de rexistros acumulados dende 2010 e que se poden filtrar segundo o tipo de información. O primeiro son as ocorrencias, que amosan as áreas nas que as especies se rexistraron, ou non, nunha área de 30 quilómetros cadrados cada semana do periodo temporal seleccionado. O segundo son os trazos, nos que non só se amosan os rexistros de cada semana senón tamén os das dúas semanas anteriores, o que facilita visualizar os cambios temporais na distribución das especies.
O terceiro tipo de rexistro son as contas, que recollen o reconto máximo tomado para a especie seleccionada nunha área de 30 quilómetros cadrados en cada semana, no caso dos mapas anuais, ou o máximo promedio daqueles que combinan a información de varios anos. E o cuarto é a fenoloxía, que se trata da ciencia que estuda a relación entre os factores climáticos e os ciclos biolóxicos dos seres vivos.
As especies observables en Galicia
Segundo o portal Galicia Birding, no momento de redacción destas palabras algúns dos últimos avistamentos foron o flamengo rosado, o galo de auga común (ou galiñola negra), o falcón pequeno, o corvo grande e a bubela. Estes son os recontos destas especies nas últimas 52 semanas, é dicir, dende a semana do 17 ao 23 de setembro de 2025 ata a mesma semana do 2026.
Podes acceder á ferramenta neste enlace.
Grazas pola noticia, moi interesante!