Unha nova revisión, publicada recentemente, estima que máis do 14% da poboación mundial presentou nalgún momento da súa vida a enfermidade de Lyme, afección provocada polo incremento da poboación de carrachas e polos cambios na actividade humana. A investigación, publicada na revista BMJ Gobal Health, revelou que Europa Central ten a taxa máis alta de infección, cun 20%, sendo os homes maiores de 50 anos que vivían en áreas rurais os que estaban en maior risco de infección.
Os síntomas que provoca a mordida dunha carracha infectada son varios e afectan a diversos órganos, pero os máis habituais son a aparición de proídos e síntomas similares aos da gripe, como dor muscular e articular, dor de cabeza, náuseas e vómitos.
Para saber como de común é a enfermidade de Lyme en todo o mundo, os investigadores recompilaron datos de ata 89 estudos. Finalmente comprobaron que a bacteria Borrelia burgdorferi, que causa a enfermidade, atopouse no sangue do 14,5% dos case 160.000 participantes.
“Esta é a revisión máis completa e actualizada da prevalencia mundial da enfermidade”, explican os investigadores. Despois de Europa Central, as rexións coas taxas de anticorpos máis altas foron Asia Oriental cun 15,9%, Europa Occidental cun 13,5% e Europa Oriental cun 10,4%. Mentres tanto, o Caribe tivo a taxa máis baixa, con só un 2%.
Aumento da poboación en risco de infección
Investigacións anteriores demostraron que a prevalencia de enfermidades transmitidas por carrachas duplicouse nos últimos 12 anos. De feito, en Europa, Lyme é considerada unha patoloxía emerxente e en España produciuse un aumento das hospitalizacións de ata o 191,8% nos últimos anos. Ademais, tal e como explicou para un recente artigo de GCiencia o decano da Facultade de Veterinaria da Universidade de Santiago de Compostela (USC), Gonzalo Fernández Rodríguez, en Galicia os casos de enfermidade de Lyme tamén están indo en aumento, afectando a poboación case todo o ano.
As razóns do aumento incluíron veráns máis longos e secos debido ao cambio climático, a migración de animais, a perda de hábitat e o “contacto cada vez máis frecuente coas mascotas”, segundo expón o estudo. Ademais, os granxeiros e traballadores que adoitan estar en contacto con cans e ovellas, presentan un maior risco de ser picados por unha carracha infectada.
Os datos poderían estar nesgados en rexións onde a enfermidade de Lyme é endémica
A investigación realizada tamén advirte que os datos poderían estar nesgados en rexións onde a enfermidade de Lyme é endémica, xa que é máis probable que se realicen probas regulares de anticorpos entre a súas poboación, en comparación cos lugares onde esta enfermidade é menos común.
Finalmente os autores indicaron que aquela investigación que usaba a técnica analítica chamada western blot era máis confiable e que o seu uso “podería mellorar significativamente a precisión de futuros estudos sobre a enfermidade”.
