Un equipo internacional de investigadores desenvolveu unha base de datos do microbioma da comida mediante a análise dos metaxenomas (termo que designa todo o material xenético do conxunto de microorganismos dun ambiente) de centos de alimentos.
Así, identificaron 10.899 microbios asociados a estes produtos, a metade dos cales eran especies descoñecidas, e mostraron que os microorganismos asociados explican o 3% do microbioma intestinal dos adultos e o 56% do microbioma intestinal infantil. O estudo publícase na revista Cell e a base de datos está accesible como un recurso de acceso aberto.
Os novos datos permiten identificar e controlar os microorganismos indesexables, estudar o movemento dos microbios ao longo da cadea alimentaria e a propagación de xenes de resistencia a antibióticos, ademais de mellorar os atributos saudables dos alimentos, entre outras aplicacións. Denominada Curated Food Metagenomic Database (CFMD), é froito do maior estudo sobre microbiomas de alimentos realizado ata o momento.
“Este recurso marcará un fito na investigación na microbioloxía dos alimentos”, sinala Abelardo Margolles, investigador do Instituto de Produtos Lácteos de Asturias (IPLA-CSIC), que participou na súa elaboración. “Este recurso axudará aos expertos a enfrontar retos que ata o de agora eran moi difíciles de abordar debido á escaseza de metaxenomas de alimentos dispoñibles nas bases de datos.”
Secuenciación xenética masiva
A base de datos CFMD é froito do traballo do consorcio internacional MASTER, que analizou máis de 2.500 metaxenomas asociados a alimentos procedentes de ata 50 países, incluídos 1.950 metaxenomas secuenciados por primeira vez. Contén datos sobre 3.600 especies microbianas, incluíndo máis de 200 novas especies.
“Aproximadamente dous terzos das mostras foron de produtos lácteos e das instalacións nas que se elaboran; e analizáronse tamén bebidas e carnes fermentadas, entre outros alimentos”, indica Margolles.
“Os microbios alimentarios poden ter un impacto positivo na produción de alimentos ou negativo -debido ao seu deterioro ou á súa implicación na transmisión de enfermidades”, engade. “Tradicionalmente, os microorganismos alimentarios estudáronse cultivándoos en caldos ou placas de Petri, pero este proceso é lento e non todos os microbios son cultivábeis”.
A identidade microbiana dos queixos artesáns
O traballo do CSIC centrouse na análise de queixos artesanais asturianos. “Analizáronse ambientes de 28 queixerías pertencentes á Asociación de Queixeiros Artesáns do Principado de Asturias, e comprobouse que os queixos de cada instalación teñen características únicas”, revela Margolles.
“Isto é importante porque poderíase asociar a especificidade e a calidade dos alimentos locais ao seu microbioma, e mesmo posibilita utilizar o metaxenoma como un marcador de autenticidade do alimento, representado unha poderosa ferramenta para garantir a súa rastrexabilidade e orixe”, conclúe.
Referencia: Unexplored microbial diversity from 2,500 food metagenomes and links with the human microbiome. (Publicado en Cell)
