O Centro de Investigacións Agrarias de Mabegondo (Ciam) ás veces érguese rodeado de néboa. Neste lugar localizado en Abegondo, a poucos quilómetros da Coruña, un equipo encárgase de recoller sementes de todo tipo de especies. Isto é así porque manter a variabilidade dos produtos galegos é unha das súas obrigas como centro de investigación.
“A nós chegounos en 2009 o tomate negro de Santiago a través dun produtor que nos deu unhas cantas sementes para que probaramos”, conta Alfredo Taboada, tecnólogo responsable da sección hortícola do banco de Xermoplasma do Ciam. “Plantámolo para ver como era e vimos que era un tomate moi bo, moi produtivo e que tiña moi bo sabor”, sostén.
Ademais desta variedade, o centro encárgase de recuperar outros tipos de tomates e outras especies en xeral. A idea é seleccionar as mellores plantas de cada especie, conservalas e rexistralas unha vez recuperadas para que os produtores as poidan comercializar a continuación. “A idea é que todos estes alimentos cheguen aos consumidores. Ese é un dos obxectivos fundamentais. Porque isto non ten que ser un museo”, explica Taboada.
Un tomate cun sabor moi potenciado
“O tomate negro de Santiago ten un sabor que chama a atención porque non é moi habitual”, asegura o experto. “A xente está afeita a tomates de supermercado, e cando proba un tomate así, que ten un punto de acidez que contrasta co contido en azucre… Todo iso fai que sexa moi saboroso”, argumenta.
Taboada remata recomendando formas de comelo. A mellor, para el, é simplemente cun pouco de aceite e sal nada máis. “Non ten un xeito especial de comelo. Só hai que gozalo”, conclúe.
B. D./T./N.,
O tomate leva tempo perdendo pouco a pouco dúas propiedades organolépticas, en favor de outras importantes, pero que están empeorando preocupantemente o conxunto. A saber…
1.- a TEXTURA en favor dun amolecemento empalagoso e
2.- o OLOR que, para quen subscribe, diferencia un verdadeiro tomate dun sucedáneo insípido.