A Estación Espacial Internacional (ISS) será esta noite o espectáculo astronómico no ceo de Galicia, se a nubosidade o permite. O paso do xigante espacial está previsto para as 23.13 horas, na que poderá ser observada a simple vista como un brillante punto luminoso que corusca a gran velocidade dende o Oeste cara ao Leste.
Como particularidade, a ISS levará acoplada a cápsula Crew Dragon, que foi lanzada o pasado sábado dende Cabo Cañaveral para levar a dous astronautas ao espazo, nunha misión histórica que devolve á NASA a capacidade de ter un vehículo espacial propio, despois de nove anos dependendo da tecnoloxía rusa e das súas naves e lanzadores Soyuz. Pero a Crew Dragon non será dende logo observable a simple vista.
O maior laboratorio orbital construido polo ser humano aparecerá como un pequeno punto branco que se move polo ceo a grande velocidade, xa que esta nave orbita arredor da Terra a uns 400 quilómetros de altura, a unha velocidade de 28.000 quilómetros por hora (preto de 8 km/s).
A Estación Espacial está a cruzar o ceo continuamente, ás veces gravando o territorio de Galicia. Tamén tomando retratos do país dende a órbita da Terra. Pero non sempre é visible, xa que iso depende de diversos factores, entre eles a nubosidade. Tamén depende da latitude na que orbite en cada xornada.
Para observala en boas condicións, cómpre afastarse da contaminación lumínica das cidades e situarse en lugares elevados onde haxa un bo campo de visión.
