Únete á nosa canle de Whatsapp
A revista científica Braña, da Sociedade Galega de Historia Natural, publicou este domingo a que é a primeira cita en Galicia da Zamenis longissimus, coñecida como serpe ou cobra de esculapio, un colúbrido presente na meirande parte de Europa e en Asia. Porén, na península ibérica a súa distribución cínguese ao noreste. A cita foi realizada por Jesús María Fariñas Álvarez no termo municipal de Nogueira de Ramuín, preto da beira do río Sil, nunha zona con cultivos de Castanea sativa naturalizados.
Tal e como se explica na nota, a observación realizada en Galicia “amplía a distribución da especie case 100km cara ao oeste”, xa que a cita máis occidental realizada ata o momento na península ibérica estaba nun “núcleo illado” na comarca da Cabrera Baja (León). E á súa vez, este núcleo dista 170 quilómetros da poboación máis próxima, nos Picos de Europa. Porén, a súa presenza máis abundante está nos Pireneos.
A serpe de esculapio
Segundo a Enciclopedia Virtual dos Vertebrados Españois, a cobra debe o seu nome a Asclepio, deus grego, (chamado Esculapio polos romanos), que inspirou o símbolo na medicina da serpe que rodea un bastón. O seu ‘apelido’ longissimus’ explícase polo seu tamaño, xa que pode superar o metro e medio de lonxitude. A cor dorsal adoita ser marrón ou parda nos adultos, e grisácea ou verdosa nos xuvenís. Ten unha cabeza estreita e alongada. Adoita alimentarse de pequenos mamíferos, como as toupas e ratos, e tamén dalgunhas pequenas aves.
Referencias (PDF):
– Primeira cita de Zamenis longissimus (Laurenti, 1768)(Colubridae, Squamata) en Galicia. (Braña).
– Culebra de Esculapio – Zamenis longissimus (Laurenti, 1768). Repositorio dixital do CSIC.
