O cancro é unha enfermidade complexa, que depende do órgano no que afecte causa diversas consecuencias. É potencialmente mortal e unha das principais preocupacións da saúde pública. Por iso, é tan importante que a xente coñeza ben as opcións que teñen por diante: os tratamentos que poderán salvar as súas vidas. Porén, o tratamento ideal ten o menor número de efectos secundarios. A cardiotoxicidade é un deles, e ás veces dáse en pacientes tratados con diversos cancros, como os de mama. Calcular a probabilidade de que esta se produza é a labor de Ana López Cheda, estatística no proxecto MCSICAR do Centro de Investigación en TIC da Universidade da Coruña.
“A cardiotoxicidade é o dano que algunhas substancias como medicamentos contra o cancro poden causar ao corazón“, explica López. Concreta que ese dano pode afectar ao músculo cardíaco ou afectar á súa función eléctrica. As consecuencias deste efecto secundario poden ser temporais, como certas arritmias ou isquemias, pero tamén permanentes e graves como cando se producen insuficiencias cardíacas.
“Nós queremos predicir cando vai sufrir un paciente a cardiotoxicidade”, afirma López. É algo que realizan a través do estudo da información de moitos pacientes, con variábeis numéricas, cualitativas e de imaxe. A investigación colabora coas institucións sanitarias para poder obter os datos e traballar a partir destes, como co Servicio de Cardioloxía do CHUAC. A partir destes realizan diversas simulacións.
Maior eficiencia e eficacia
Malia que todos os pacientes reciben o mesmo tratamento, os efectos que provoca sobre as persoas son diferentes. A importancia do seu traballo é poder comprender en que perfiles é máis probable que se dea a complicación da cardiotoxicidade. “Dependendo das características dos pacientes pódese decidir se esa paciente vai sufrir ese efecto adverso no corazón ou non”, afirma López. É algo clave para mellorar os métodos de prevención e poder saber en que casos se deben realizar, por exemplo, revisións máis frecuentes.
O proxecto pretende, tamén, dar terapias máis precisas, mellorar a calidade de vida dos pacientes e controlar mellor os síntomas en caso de que ocorran. “Tamén a niveis loxísticos axuda a unha mellor atención por parte do persoal sanitario”, explica, xa que poden reducir os gastos en terapias ou ata en tempo de pacientes aos que non lles vai servir o tratamento porque hai outras alternativas.
- Escoita O Descodificador en todas as nosas plataformas de podcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser
- O CITIC está acreditado como Centro de Excelencia e membro da Rede CiGUS para o período 2024-2027. A acreditación, estruturación e mellora do CITIC está cofinanciada pola Xunta de Galicia e nun 60% pola Unión Europea no marco do Programa Operativo FEDER Galicia 2021-2027, co obxectivo temático de promover “unha Europa máis intelixente: transformación innovadora e intelixente” (ED431G 2023/01).
