As altas temperaturas volverán a Galicia no seu día especial, o 25 de xullo. MeteoGalicia prevé que unha nova masa atmosférica de altas presións devolva a calor para a fin de semana, cos termómetros que acadarán os 30 graos en cidades como Vigo e que os superarán en Ourense e en Pontevedra.
A situación prevista polos modelos contrasta coa xornada de chuvascos que se vive desde esta fin de semana. A temperatura máis alta en toda Galicia foi en Vilamor, con 24,1 graos. As mínimas descenderon dos 10 en localidades como Viana do Bolo, Calvos de Randín ou Baltar. Ademais este domingo tamén se rexistraron chuvascos no Courel, en Baños de Molgas e Quiroga, entre outros.
Este comezo de semana seguirá a manter algunhas dinámicas do pasado sábado e domingo en parte da comunidade, especialmente no oeste. A situación intermedia entre altas e baixas presións provoca un tempo cambiante. Haberá néboas, nubes baixas e chuvascos illados en varias localidades galegas.
Máximas de 33 graos
As temperaturas continuarán a ser moderadas aínda que aumentarán progresivamente durante a semana. En Ourense este martes xa rozarán os 30 graos, aínda que no resto das grandes cidades as máximas non pasan dos 26. O mércores as altas presións non evitarán a posible presenza de chuvascos illados na parte norte de Galicia. Os ventos soprarán de compoñente norte, moderados pola tarde.
O día de Galicia amosará xa as consecuencias da chegada do anticiclón. En Vigo os modelos indican que os termómetros acadarán os 29 graos e que chegarán os 30 durante a fin de semana. Aínda algo máis de calor haberá en Ourense, onde o venres xa se superarán os 30 graos e se agardan 33 durante o sábado e o domingo.
A calor será algo máis moderada na metade norte, segundo as estimacións da institución. O venres, a capital rexistrará uns moderados 25 graos e evolucionará ata os 28 no domingo. Serán temperaturas similares ás da Coruña e Lugo, sendo ata máis moderados na capital de interior.
