“Dálle valor ao peixe” é o nome da iniciativa impulsada polo grupo de Bioquímica dos Alimentos do IIM-CSIC e a empresa Vegalsa-Eroski e dirixida polo cociñeiro Pepe Solla. A actividade, que conta tamén coa colaboración do Concello de Vigo, pretende achegar a alumnos de 4º, 5º e 6º de Primaria de colexios de Vigo a importancia dunha alimentación saudable, así como aprender sobre a calidade do peixe e a súa etiquetaxe.
Os obradoiros, que dan comezo este mércores 4, celebraranse no mercado do Progreso de Vigo. Durante as sesións, Solla ensinará aos asistentes algunhas especies de peixe pouco frecuentes na cesta da compra, pero co mesmo valor nutricional, como o xurelo, a xarda, o escacho ou a maragota; ademais, informará sobre a importancia do peixe na prevención de enfermidades e no coidado da saúde, así como coa información obrigatoria que debe aparecer nas etiquetas destes produtos.
Antes de cada un dos obradoiros, os escolares visitarán a peixaría de Vegalsa-Eroski situada no mercado do Progreso para aprender con exemplos reais, e posteriormente trasladaranse á cociña do mercado. Entre outros pratos, Solla preparará uns fingers de peixe, que despois degustarán os participantes.