Ourense bate o récord de temperatura en España no mes de outubro

Ourense bate o récord de temperaturas en España no mes de outubro dende que hai rexistros. Os 37,5 graos rexistrados por Meteogalicia no observatorio de Remuíño en Arnoia e os 37,3 alcanzados no observatorio de Leiro supoñen un máximo a escala estatal.

Entre as cidades galegas, Ourense (32) foi a única que estivo por riba dos 30 graos, pero Pontevedra se situou moi preto, con 29 graos rexistrados.

Publicidade

Pero son os datos de Leiro e Arnoia os que realmente fan historia. A temperatura máxima no mes de outubro rexistrada en España correspondía ata o de agora aos 36,5 graos de Xerez da Fronteira no ano 2011. Nos seguintes anos, as temperaturas máximas do mes foron: Córdoba (34,6, no 2016), Alicante (34,3 no 2015), Málaga (36,3, 2014), Tortosa (34,5, 2013) e Murcia-Alcantarilla (35 graos, no 2012).

Segundo os datos da Axencia Española de Meteoroloxía, a seguinte temperatura máxima tras os datos de Ourense é a de Badaxoz, con 36 graos rexistrados este martes 3 de outubro.