O Concello da Coruña, a través dos Museos Científicos Coruñeses, convoca os premios Prismas Casa das Ciencias á Divulgación. O certame, que alcanza en 2024 a súa trixésimo sétima convocatoria consecutiva, premiará cun Prisma de Bronce os mellores traballos en oito categorías: Vídeo, Novos medios, Artigo xornalístico, Radio, Proxectos singulares, Libro editado e, con motivo do 25 aniversario do Aquarium Finisterrae inclúese a nova modalidade de Proxecto de sensibilización e divulgación sobre os océanos. Ademais, concederase un Prisma Especial do Xurado a persoas ou institucións que destacan pola súa contribución á divulgación científica.
Todos os traballos presentados deberán xirar arredor de calquera tema en relación coas ciencias, tanto nos seus aspectos xerais como en calquera das súas ramas ou aplicacións prácticas, incluíndo biografías de científicos e historia da ciencia, que contribúan á mellor comprensión de ideas, actitudes e procesos científicos. Estes proxectos estarán dirixidos ao público en xeral, como se reflicte nas premisas dos premios.
Todas as modalidades, excepto a de Libro editado (recibirá un Prisma de Bronce para a editorial) e a de Prisma especial do xurado, están dotadas cun premio de 4.000 euros. Para participar nesta XXXVII Convocatoria dos Prismas á Divulgación deben presentarse os traballos e candidaturas antes do 3 de xuño, cumprindo as condicións requiridas en cada unha das modalidades recollidas nas bases.
Con todo, é o Xurado dos Prismas quen ten a última palabra sobre os proxectos gañadores. Estará formado por, polo menos, cinco membros nomeados pola Organización, a cargo dos Museos Científicos Coruñeses. Entre eles, estarán persoas de recoñecido prestixio no campo da divulgación científica, o xornalismo científico e a ensinanza das ciencias. A alcaldesa da Coruña, Inés Rey, ou un delegado nombrado por ela, presidirá o Xurado, mentres que a figura do Secretario residirá no responsable de servizo dos museos. A presidencia dirixirá e ordeará as deliberacións e votacións, sendo depositario, en caso de empate, do voto de calidade.
Os criterios nos que se baseará este Xurado para conceder os premios partirán de tres requisitos. En primeiro lugar, o rigor científico e estilo educativo. Segundo, unha comunicación clara e sinxela de temas científicos de interese e actualidade. En terceiro e último lugar, que posúan capacidade de divulgación e creatividade para comunicar a ciencia. A entrega dos premios Prismas realizarase no transcurso dun acto que se celebrará na Coruña o sábado 16 de novembro de 2024.
