O xurado dos Premios Prismas Casa das Ciencias, un dos galardóns máis relevantes da divulgación científica en España, e que outorgan os Museos Científicos Coruñeses, anunciou este martes o ditame da súa 36ª edición.
As categorías nas que se concede os Prismas de Bronce son as seguintes: vídeo, novos medios, libro editado, artigo xornalístico, traballo en radio e proxecto singular.
- Mellor traballo en vídeo: Maa-Yiem, a extraordinaria historia de Jordi Sabater Pi, de Alfonso Par, por dar visibilidade a unha figura fascinante a través dun magnífico relato e o uso exemplar dos recursos cinematográficos.
- Mellor traballo en novos medios: Amautas: la aventura del conocimiento, presentado por Javier Santaolalla Camino, Jorge Pérez Melián e José Daniel Edelstein Glaubach, por poñer ao alcance do público unha oferta multiformato de contidos divulgativos variada e de gran calidade.
- Mellor libro editado: La lira desafinada de Pitágoras, de Almudena Martín Castro para Harper Collins Ibérica, por narrar de forma accesible, rigorosa e elegante o complexo vínculo entre a ciencia e a música.
- Mellor artigo xornalístico: La ciencia de estirar el tiempo, de Eugenia Angulo Alonso para Revista Alfa, por ofrecer unha mirada ao futuro baseada na investigación contemporánea nun texto de gran calidade que acode a fontes diversas e relevantes.
- Mellor traballo en radio: Desdibuixem les cançons de Marco Mezquida amb les il·lusions musicals, de Laura Farré Rozada, por incorporar a perspectiva das matemáticas á programación cultural dunha emisora pública, achegando a ciencia a novas audiencias.
- Mellor proxecto singular: María Andresa Casamayor, presentado por Julio Bernues Pardo, Pedro Miana Sanz, Raquel Villacampa Gutiérrez e Instituto Universitario de Matemáticas y Aplicaciones da Universidade de Zaragoza, por recuperar unha figura descoñecida pero de gran relevancia a través de múltiples formatos e coa participación de diversos axentes sociais.
Ademais, o xurado decidiu outorgar o Prisma Especial do Xurado ao Planetario de Pamplona, pola súa gran “implantación social, o extraordinario impacto público das súas iniciativas e o nivel de excelencia mantido polo seu equipo ao longo dunha extensa traxectoria”. Tamén se decidiu outorgar unha mención honorífica na modalidade de Prisma Especial do Xurado a Rogelio Sánchez Verdasco, polo seu “inefatigable impulso de proxectos colectivos e o enfoque innovador do seu traballo sempre xeneroso”.
O xurado estivo composto por Elena Lázaro, coordinadora da UCCi na Universidade de Córdoba, como presidenta; Oscar Huertas, técnico de Comunicación e Divulgación Científica en CICA-UDC; Manuel Rey, responsable de comunicación no Instituto Galego de Física de Altas Enerxías (IGFAE); Socorro Castro, profesora titular de Química Inorgánica na Universidade da Coruña; e Marcos Pérez Maldonado, xefe de servizo dos Museos Científicos Coruñeses, que actuou como secretario.
A entrega dos premios terá lugar nun acto que se celebrará o sábado 18 de novembro na Coruña.
