Un novo cometa aproxímase cara a Terra e, con toda probabilidade, poderá verse en outono de 2024 con gran claridade. O Centro de Planetas Menores identificouno a finais de febreiro como C/2023 A3 (Tsuchinshan-ATLAS). Leva aparellado o nome dos centros que o detectaron. Uns días antes, o mércores 22 de febreiro, o telescopio ATLAS en Sudáfrica detectou un obxecto tenue que resultou ser o cometa, provisionalmente nomeado como A10SVYR. O obxecto xa fora captado polo Observatorio da Montaña Púrpura, tamén coñecido como Observatorio Astronómico de Zijinshan, o 9 de xaneiro de 2023, pero eliminouse dos rexistros e dérase por perdido. Estase xerando gran expectación respecto ao cometa.
Segundo o portal astronómico Starwalk Space en base aos cálculos do Centro de Planetas Menores, o cometa alcanzará unha magnitude de 0,3 entre o 5 e o 7 de outubro do 2024 e, por tanto, o seu máximo brillo. Isto significa que podería observarse desde a Terra á perfección durante esas datas. Con datos actuais, o astro atópase a 7,157 UA (unidades astronómicas) do Sol; o 27 de setembro de 2024 estará a 0,398 UA, é dicir, a máis de 59 mil kilómetros. O 13 de outubro é a data sinalada, xa que acadará a mínima distancia co noso planeta.
Xa desde un foro de interesados pola astronomía (Astropolis) advirten que desde o mesmo 27 de setembro ao 2 de outubro de 2024 do ano que vén se poderá observar o cometa a simple vista pola mañá desde o hemisferio norte; desde o hemisferio sur comezará a aparecer no ceo pola mañá en setembro. A mediados de novembro, remataríase a visibilidade a simple vista e só podería observarse con binoculares e telescopios. En 2025 tocaría dicirlle adeus ao cometa.
O último que se puido ver foi o C/2022 E3, de cor verde brillante, que se achegou á Terra por primeira vez en 50.000 anos, é dicir, desde a épocas dos neardentais. Foi o 1 de febreiro deste ano cando puido observarse con claridade desde a Terra, con imaxes ata de Vila de Cruces.
