Comezan a compartirse fotografías do cometa verde en Galicia. Dende o Observatorio Astronómico de Vila de Cruces, o veciño José Ramón Moire realizou unha serie de capturas esta madrugada. Fotografou o cometa varias veces coa súa cámara apoiada nun trípode. Cunha velocidade de obturación alta puido capturar tamén un satélite. Na imaxe obsérvase perfectamente a cor verdosa do cometa e incluso poden apreciarse algunhas constelacións.
Aproximadamente, o corpo celeste atópase a uns 42 millóns de distancia do planeta e os expertos descoñecen a onde viaxará despois de visitarnos. O consenso está en que non volveremos velo máis, xa que non orbita dentro do sistema solar e crese que regresará ás súas profundidades. A noite do 1 de febreiro será un dos mellores momentos para contemplalo pola súa proximidade coa Terra. Se non tes a oportunidade, podes ver unha retransmisión no Proxecto Telescopio Virtual (The Virtual Telescope Project). Lembra afastarse da contaminación lumínica e acostumar os teus ollos durante un tempo á escuridade.
Podes enviar as túas fotos do cometa a redaccion@gciencia.com.
