Este xoves 2 de febreiro ás 11.00 horas celebrarase o obradoiro Investigación-acción participativa nas paisaxes históricas nas instalacións do Centro de Investigación Interuniversitario das Paisaxes Atlánticas (Cispac). O taller está organizado polo grupo de investigación Histagra da Universidade de Santiago (USC) no marco das actividades do Laboratorio Ecosocial do Barbanza para 2023. Esta sesión de traballo pretende xuntar diferentes experiencias de investigación-acción participativa para poñer en común traxectorias, metodoloxías e oportunidades.
A primeira parte do obradoiro conformarana a presentación de tres proxectos. O primeiro relator será Pablo López Gómez, arqueólogo e intérprete do patrimonio do Centro D’Investigación y Ecomuséu La Ponte. Logo participará Jaime Izquierdo Vallina, actual comisionado para o Reto Demográfico do Goberno de Asturias, que presentará o proxecto do Sistema Agroecológico Local de Moal. En terceiro lugar falará Roque Sanfiz Arias, investigador predoutoral e membro do equipo de traballo do Laboratorio Ecosocial do Barbanza.
A continuación, abrirase un tempo de debate moderado por David Fontán Bestilleiro, tamén investigador predoutoral e membro do Laboratorio Ecosocial do Barbanza. A discusión xirará arredor de tres bloques temáticos. O primeiro deles abordará cales son as metodoloxías útiles para traballar en proxectos que conectan distintas disciplinas e ademais se constrúen sobre a investigación-acción participativa, integrando ás comunidades locais. O segundo centrarase nas problemáticas que se afrontan neste tipo de proxectos e como solventalas. Finalmente, haberá un bloque dedicado ás oportunidades para desenvolver este tipo de proxectos no contexto actual.
