As persoas afeccionadas á astronomía teñen por diante unha cita máis co ceo nocturno antes de rematar o mes: o 28 de agosto terá lugar unha eclipse parcial de Lúa que será visible en toda a península. Este fenómeno, como indica o Observatorio Astronómico Nacional do Instituto Xeográfico Nacional (IGN), poderá observarse a simple vista, xa que non supón ningún risco para os ollos nin require instrumentos especiais para poder presenciar o evento.
Este espectáculo visual poderá apreciarse dende o oeste de Asia, Europa, África e América. E aínda que a eclipse se verá en todo o territorio nacional, o observatorio apunta que non todos os lugares terán a mesma experiencia. No centro e leste peninsulares, as illas Baleares e Melilla, a Lúa ocultarase antes de que termine a fase parcial da eclipse, mentres que no resto de España —incluíndo Galicia— o ocaso lunar sucederá despois de rematar a parcialidade. É dicir: dende a comunidade galega o fenómeno será visible de principio a fin.
Nas eclipses lunares totais, explica a NASA, parte da luz solar atravesa a atmosfera terrestre e ilumina a superficie da Lúa. As cores con ondas curtas (como o azul ou o violeta) dispérsanse con máis facilidade que as de onda longa (como o vermello e o laranxa). As lonxitudes que chegan ao satélite e o tinguen durante o evento son as longas e, por iso, nunha eclipse lunar total o astro vístese de vermello. Neste caso, ante un fenómeno parcial, non tomará a intensa cor característica, mais si presentará algúns riscos alaranxados.
Que é unha eclipse lunar?
A atención mediática das últimas semanas estivo posta sobre as eclipses solares, mais non por iso se debe esquecer que tamén existen outros tipos. O IGN explica que as eclipses de Lúa se producen cando o satélite pasa pola sombra (a umbra) que proxecta a Terra. É dicir, se no evento do 12 de agosto a Lúa se interpuxo entre o Sol e a Terra, nesta ocasión é o noso planeta o que se sitúa entre os dous astros. Por este motivo, sempre que se produce este evento cando hai Lúa chea.
Outra diferenza importante fronte ás eclipses solares é a zona de observación. Nestas, é preciso estar nunha rexión terrestre na que se proxecte a sombra da Lúa, mentres que unha eclipse lunar pode verse dende calquera lugar do mundo no que sexa de noite no momento da conxunción.
A que hora se verá dende Galicia?
O Observatorio Astronómico Nacional pon a disposición do usuario unha ferramenta interactiva (accesible no apartado ‘capitais de provincia’) que sinala o momento no que terá lugar a eclipse lunar nas catro capitais galegas. No caso galego, todo o territorio terá o mesmo horario: a Lúa comezará a tinguirse de tonalidades cobrizas a partir das 4:34 horas da madrugada. O punto máximo da eclipse lunar será ás 6:12 horas, cando acade unha magnitude de 0,92, isto é, cando o 92% do diámetro do astro estea cuberto pola umbra. Ás 7:52 horas rematará o evento.
