O cambio climático non é unha posibilidade do futuro, senón unha realidade do presente que está a transformar o noso planeta. Matt Fitzpatrick, investigador da Universidade de Maryland (EEUU), leva anos estudando como esta situación está a afectar a nosa forma de vida, e grazas ao emprego masivo de datos e os seus respectivos modelos matemáticos, cada vez máis complexos e completos, é capaz de facernos viaxar ao clima do futuro cun obxectivo claro de xerar unha conciencia colectiva:
É posible que vostede xa experimentara cambios no lugar onde vive e se pregunte: Como será o clima do futuro onde vivo? Fará moita calor no verán? Seguirá nevando no inverno? E, tal vez: Como podería mudar o rumbo das cousas se actuamos para reducir as nosas emisións [de efecto invernadoiro]?
Para dar resposta a todas estas preguntas, Fitzpatrick creou a aplicación What will climate feel like in 60 years?, un mapa interactivo que permite ao usuario consultar cal podería ser o clima da súa rexión dentro de medio século amosando, a modo de situación parella, as condicións doutra zona do mundo na actualidade.
Os resultados sorprenden, e moito: en 60 anos a poboación de Ourense experimentará un incremento das temperaturas de máis de cinco graos de media. O día a día do futuro no sur de Galicia será como vivir na actual Estremadura. O análogo de Cangas do Morrazo é Calabria, ao sur de Italia. Segundo a aplicación, a meirande parte da provincia de Pontevedra terá un clima similar á zona de Aveiro, no centro de Portugal. Como é lóxico, estas previsións non son exactas ao 100 %, senón que se basean en distintos modelos preditivos atendendo ás tendencias actuais.
Climas inéditos no mapa
Unha conclusión interesante, segundo o seu autor, é que ningunha cidade ten un clima futuro idéntico ao actual: “De feito, debido á magnitude do cambio climático previsto, para moitas cidades a “mellor” coincidencia non é do todo similar. Isto significa que moitas cidades poderían experimentan no futuro un clima distinto ao actual na Terra”, conclúe.
Podes comprobar como será o clima do futuro nas distintas zonas de Galicia na seguinte ligazón.
