Dá comezo a xornada O impacto da Cyber Resilience Act (CRA) na ciberseguridade do ecosistema dixital. Este evento, que se desenvolve no marco do programa RETECH, foi inaugurado por Damián Rey, director da Axencia para a Modernización Tecnolóxica de Galicia (Amtega). O máximo responsable da axencia autonómica destacou a importancia da cooperación público-privada para abordar os retos da ciberseguridade.
Damián Rey incidiu: “A Administración autonómica leva anos apostando por consolidar un ecosistema sólido no que institucións públicas, empresas, centros tecnolóxicos e ámbito académico traballemos intercambiando sinerxías e coñecementos”. Con ese obxectivo naceu hai seis anos o Nodo CIBER.gal, “un espazo de referencia para esa colaboración público-privada”, explica. Só no último ano o Nodo impulsou máis de 300 actividades de formación, sensibilización e divulgación, que chegaron a máis de 11.000 persoas.
O director da Amtega destacou: “Nesa mesma liña de colaboración e impulso ao tecido produtivo, demos un paso máis coa posta en marcha da iniciativa RETECH que desenvolvemos xunto con Cataluña e a Comunidade Valenciana para a creación dun Centro de Innovación e Competencias en Ciencias da Saúde, Transporte Intelixente, Industria Conectada e Excelencia Operativa”.
Un espazo de investigación e prevención
No marco desta iniciativa porase en marcha a finais de xuño un laboratorio transversal con dous espazos, un centrado en produtos con elementos dixitais e outro na protección de infraestruturas e procesos produtivos fronte a riscos dixitais, que ofrecerán ás empresas contornas reais nas que probar solucións e anticipar riscos ante un contexto normativo e tecnolóxico cada vez máis esixente.
Estos espazos estarán na Cidade da Cultura para, posteriormente, trasladarse ao futuro Centro de Excelencia en Ciberseguridade de Galicia de Ourense.
