En menos de catro meses, coincidindo co día 12 de agosto, poderase vivir unha eclipse total de Sol visible dende Galicia, que será o primeiro territorio en España en observar como a Lúa oculta por completo o Sol. Este fenómenon non acontece dende o ano 1912 e non se volverá repetir ata 2180. Pero antes de chegar á cita astronómica do verán, o 30 de abril convértese nunha data clave: será un día xemelgo da eclipse, no que o Sol ocupará exactamente a mesma posición que terá durante esta xornada de agosto. Así, producirase unha curiosa coincidencia astronómica que permitirá realizar un “ensaio xeral” da eclipse.
Este fenómeno débese a que, debido á xeometría da órbita terrestre e ao movemento aparente do Sol no ceo, a finais de abril a estrela se situará practicamente na mesma posición que o 12 de agosto. En termos prácticos, significa que se o 30 de abril se mira cara ao oeste á mesma hora da eclipse —arredor das 20:20 horas—, verase o Sol exactamente no lugar onde aparecerá eclipsado.
O evento astronómico ocorrerá moi preto do horizonte, algo pouco habitual en eclipses totais. O Sol estará apenas a uns graos de altura cando chegue a totalidade, polo que calquera obstáculo podería arruinar a observación. Por iso, este “día xemelgo da eclipse” convértese nunha ferramenta práctica para planificar onde velo. Así, o Colexio Oficial de Ópticos Optometristas de Galicia considera o 30 de abril un momento ideal para probar as lentes de eclipse, fundamentais para visualizar correctamente e con seguridade o fenómeno de agosto.
