Case a metade dos galegos entre 65 e 74 anos xa son internautas

No último ano incorpóranse máis de 100 maiores diariamente ao uso da rede

Curso de asesoramento TIC
Os cursos de capacitación son unha das claves na incorporación dos maiores á rede.

O uso de internet entre os galegos de 65 a 74 anos está a experimentar un salto moi grande nos últimos anos e xa un 47 por cento das persoas comprendidas nesa franxa de idade utilizan a rede, fronte a o 21 por cento que o facían hai so cinco anos. O incremento do uso de internet entre os maiores está relacionado con factores coma os despregamentos de novas infraestruturas de telecomunicacións e as iniciativas de capacitación dixital. Entre elas se atopan a Rede de aulas CeMIT, impulsadas pola Xunta en colaboración cos concellos.

O perfil sociodemográfico de Galicia (poboación envellecida) fai que a comunidade ocupe case sempre as últimas posicións en canto a uso de internet entre as autonomías pero nos últimos anos se está a dar un incremento sostido que supera á media estatal. Entre a poboación máis nova, por debaixo de 35 anos, o uso da rede é prácticamente universal.

Para dar unha idea da importancia do incremento do uso de internet entre os maiores, basta sinalar que no ultimo ano máis de 100 galegos entre 65 e 74 anos se incorporaron á rede cada día, ata sumar preto de 40.000 novos internautas. Iso supón un incremento de. dun 35% no 2018 a preto do 47% no 2019, segundo se recolle no estudo “A Sociedade da Información nos fogares galegos. Edición 2019”, elaborado polo Observatorio da Sociedade da Información en Galicia (Osimga) que está adscrito á Axencia de Modernización Tecnolóxica de Galicia (Amtega).

No que se refire aos datos do conxunto da poboación, a porcentaxe de usuarios de internet en Galicia incrementouse un 6,9% respecto ao resultado do ano 2018 e sitúase no 85,6%. No caso de convivencia con nenos e nenas en idade escolar obrigatoria a porcentaxe de uso de internet ascende ao 95,8%

No período 2016-2019, a evolución de persoas que utilizaron Internet nos tres últimos meses en Galicia foi dun 15,7% dende o ano 2016, fronte ao 12,5% do conxunto de España e o 4,9% da Unión Europea. Entre os galegos que utilizaron Internet nos últimos tres meses, un 85,6% faino a diario e un 11,6% todas as semanas, datos que sitúan a Galicia cuns datos algo por riba da media estatal.

O uso de Internet continúa a incrementarse en todos os tipos de hábitat analizados. É de salientar que nos concellos de menos de 5.000 habitantes experimentouse a maior suba do indicador desde o pasado ano (11,9 puntos porcentuais). Deste xeito preto do 74% das persoas que residen nestes municipios utilizaron Internet nos últimos tres meses.

No último ano incorporáronse á rede preto de 40.000 novos internautas entre 65 e 74 anos

Respecto á contratación o 88,1% dos fogares galegos ten un servizo de internet contratado, segundo se recolle no estudo Esta porcentaxe supón un incremento dun 11,9% respecto ao ano 2016. No mesmo período, Galicia presenta un ascenso superior ao observado a nivel europeo (5,9%) e moi semellante ao crecemento da media estatal (11,6%).

Cómpre destacar como a convivencia con nenos eleva, considerablemente, a porcentaxe de contratación de internet. O 99% dos fogares con nenos e nenas en idade escolar obrigatoria teñen internet contratado mentres que nos fogares sen menores de 6 a 16 anos a porcentaxe descende ata o 84,7%.

O informe amosa que o crecemento na contratación a internet rexístrase especialmente nos núcleos de menos habitantes. Nas entidades de poboación con menos de 5.000 persoas, a porcentaxe de fogares con servizo de internet sitúase no 79%, fronte ao 69,7% de 2018.

Máis da metade dos fogares galegos (51%) que ten contratado Internet, conta cunha conexión á rede superior a 30 Mbps, o que supón un incremento do 6% respecto ao ano anterior e, amosando a rápida evolución de velocidade dispoñible. Así se recolle no recolle no estudo que destaca, tamén, o incremento do 81,7%, experimentado pola porcentaxe de fogares con velocidade de conexión a Internet contratada superior aos 100 Mbps no último ano, situándose no 23,8%.

En 2019 máis do 70% dos internautas galegos intereacturaron coas administracións a través da rede para obter información, case un 20% máis que no conxunto do Estado

No referente á administración electrónica, en 2019 o 70,6% dos internautas galegos interactuaron coas administracións públicas a través de Internet nos últimos doce meses para obter información, o que supón un incremento do 6,5% no último ano. No conxunto do Estado este indicador sitúase no 53,7%.

Ademais, o 66,8% das persoas que utilizaron Internet nos últimos 12 meses e realizaron xestións coa Administración, tamén enviaron formularios cumprimentados a través da Rede. O tipo de interacción coas AAPP que máis se incrementou no último ano foi a descarga de documentos xerados polas propias administracións a petición do cidadáns, que experimentou un crecemento do 44,4% e sitúase no 52%.

Con independencia do indicador que se estea a analizar, atópase un denominador común: a influenza de determinados factores e características socio-demográficas na implantación e evolución das TIC en Galicia. Os factores que inciden máis intensamente nos indicadores TIC analizados son a idade, o nivel de estudos, a renda familiar e o tamaño do hábitat. A menor idade, maior uso da Internet, acadando niveis de uso practicamente universais nas idades máis temperás.

Os fogares situados nos hábitats máis poboados acadan porcentaxes superiores de contratación de Internet; situándose por riba do 90% nos concellos de máis de 20.000 habitantes. O número de persoas no fogar novamente afecta de maneira positiva á contratación de Internet, superando o 98,6% de fogares con Internet contratado nas vivendas de 4 membros.Poden consultarse os datos do informe na seguinte ligazón: www.osimga.gal

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.