Na xornada de onte notificábase o primeiro caso de virus Oropouche en Galicia: segundo a Consellería de Sanidade, trataríase dun paciente situado na área sanitaria de Lugo, que non precisou ingreso en ningún momento. Con este, xa son cinco os casos de virus identificados este verán na península, todos eles importados da rexión de Cuba.
As autoridades sanitarias non descartan que haxa máis deteccións no que resta de mes, xa que neste mesmo instante distintos países latinoamericanos sofren un gromo deste virus. Aínda así, o risco de transmisión en Galicia é moi baixo xa que, o vector principal transmitor do virus, o mosquito jején, non está presente en Europa.
Que sabemos sobre o virus Oropouche e sobre o mosquito que o transmite?
Unha sintomatoloxía similar á do dengue
O ouropouche é unha enfermidade zoonótica, causada polo virus homónimo (OROV), pertencente á familia Peribunyaviridae. Detectouse por primeira vez no ano 1955 preto do río Oropouche, en Trinidade.
O virus contáxiase a través da picada dun mosquito infectado, principalmente o Cilicoide paraensis, tamén coñecido como mosquito jején ou jején hematófago.
En canto aos síntomas, a enfermidade de Oropouche cursa dun xeito similar ao dengue: febre, dor de cabeza, rixidez nas articulacións, dores, visión dobre, náuseas… en ocasións moi excepcionais, o paciente pode presentar un caso grave de meninxite aséptica. No 2024, Brasil reportou dous falecidos por Oropouche: Ata este ano, non había rexistros de mortes debidas á enfermidade.
Fai unha semana, a Organización Panamericana da Saúde (OPS/OMS) notificaba gromos do virus en Brasil, Perú, Arxentina, Bolivia, Colombia, Panamá e Trinidade e Tobago. Os casos ata o de agora rexistrados no continente europeo son casos importados, é dicir, de viaxeiros que regresaron deste lugares xa infectados polo virus.
Aínda que a probabilidade de transmisión do Oropouche é baixa ao non estar presentes os seus vectores transmisores en Europa, Sanidade Exterior admite que non existe evidencia de que as especies europeas de mosquitos non poidan transmitir o virus.
Na actualidade non existen vacina nin tratamentos fronte á enfermidade causada polo virus, e a única estratexia fronte ao Oropouche é a prevención e o emprego dalgún medicamento para reducir a febre e a dor.
