O anuncio de Moderna é o terceiro nunha semana sobre a carreira na vacina da Covid-19 que supera a eficacia do 90 na fase 3. Foto: Pixabay.
O anuncio de Moderna é o terceiro nunha semana sobre a carreira na vacina da Covid-19 que supera a eficacia do 90 na fase 3. Foto: Pixabay.

Moderna adiántase na carreira da vacina da Covid-19 e anuncia unha eficacia do 94,5%

A multinacional sostén que acadou novos avances nunha análise intermedia da fase 3, mais aínda non publicou os resultados polo miúdo

A procura dunha vacina fronte á pandemia causada polo coronavirus SARS-CoV-2 vive este luns unha nova sacudida despois do anuncio da multinacional Moderna, que xa avanzara éxitos anteriores no seu proxecto, e que nun comunicado difundido nas últimas horas sostén que a súa candidata ten unha eficacia do 94,5%. Os resultados correspóndese coa primeira análise intermedia da fase 3 do ensaio clínico, no que participaron máis de 30.000 persoas nos Estados Unidos. Por agora, os resultados anunciados este luns non foron publicados en ningunha revista científica revisada por pares, aínda que Moderna expón no mesmo comunicado que dará este paso unha vez finalicen a fase 3 do ensaio, coñecido como COVE, e anticipa que “a medida que se acumulen máis casos antes da análise final, a compañía agarda que o punto estimado da eficacia da vacina poida cambiar”.

Segundo esta mesma información, a análise detectou 95 casos de Covid-19 entre as persoas participantes. Delas, 90 formaban parte do grupo que recibiu o placebo, mentres que outros cinco eran persoas que recibiran a vacina. Segundo os criterios do estudo, notificáronse 11 casos graves de infección, todos no grupo placebo.

A análise intermedia da fase 3 revelou 95 casos de Covid-19 entre máis de 30.000 persoas, das que 90 recibiran o placebo

A compañía sostén tamén que “non se reportou ningún problema de seguridade significativo”, e que “unha revisión dos efectos adversos indica que a vacina foi, en xeral, ben tolerada”. A maioría destes efectos foron leves ou moderados, con consecuencias como fatiga (9,7%), dor muscular (9,7%), dor articular (5,2%), cefalea (4,5%), dor no lugar da inxección (2,7%) ou irritación na zona (2%). “Este é un momento crucial no desenvolvemento da nosa vacina candidata. Desde comezos de xaneiro, perseguimos este virus coa intención de protexer á maior cantidade posible de persoas en todo o mundo, e neste tempo soubemos que cada día importa. Esta análise intermedia positiva no noso estudo de fase 3 danos a primeira validación clínica de que a nosa vacina pode previr a Covid-19, incluíndo os casos graves”, afirmou Stéphane Bancel, CEO de Moderna.

Segundo recolle Materia, o español Juan Andrés, director técnico de Moderna, “non esperabamos nin en soños” os resultados obtidos, sempre segundo a versión da compañía, que desenvolve o ensaio COVE coa colaboración da Food and Drug Administration (FDA) dos Estados Unidos, e os National Institutes of Health (NIH).

Pola súa parte, Reuters recolleu algunhas reaccións de expertos ao anuncio. Un deles, Peter Openshaw, profesor de Medicina Experimental no Imperial College de Londres, expón que son noticias “tremendamente emocionantes e que aumentan considerablemente o optimismo de que teremos unha selección de boas vacinas nos vindeiros meses”. Con todo, Openshaw advertiu de que “necesitamos detalles máis completos ca este comunicado de prensa”. Engadiu: “Aínda non sabemos canto pode durar, por exemplo, a inmunidade protectora. Para isto teremos que agardar”.

Nos últimos meses, Moderna deu conta dos avances da vacina a través de varias publicacións no The New England Journal of Medicine, onde están dispoñibles algúns resultados da fase 1 e unha análise preclínica realizada en macacos.Este mesmo luns, a Axencia Europea do Medicamento (EMA) anunciou pola súa parte que o seu comité de medicamentos humanos ía comezar a revisión da vacina de Moderna, e que continuará “ata que haxa a suficiente evidencia dispoñible para aprobar a autorización de comercialización”, cumprindo cos estándares de eficacia, seguridade e calidade.

Deste xeito, a multinacional sitúase na primeira liña da carreira pola vacina fronte á Covid-19, despois dos anuncios realizados a semana por Pfizer e BioNTech, que situaron a eficacia da súa candidata nun 90%, e do Instituto Gamaleya de Moscú, cuxa vacina Sputnik V estaría no 92%.

Pfizer anuncia que a súa vacina ten unha efectividade do 90%

Rusia anuncia que a súa vacina ‘Sputnik V’ ten eficacia do 92%

Como é a vacina de Moderna?

A vacina de Moderna, que recibe o nome de mRNA-1273, consiste nunha nova tecnoloxía xenética, alternativa ás dispoñibles ata o seu momento. En vez de inocular virus para inducir unha resposta inmunitaria como fan as vacinas tradicionais, ou de inocular directamente as proteínas que xerarán esta inmunidade, esta nova vacina inocula instrucións xenéticas. Estas instrucións, codificadas en moléculas de ARN producirán as proteínas que estimularán a inmunidade contra o virus.

O común ata a chegada da Covid-19 era empregar virus modificados, por exemplo do arrefriado común, como están facendo outros proxectos fronte ao coronavirus. Pero Moderna abriu o camiño cunha nova idea, semellante á que tamén aplica o proxecto de Pfizer e BioNTech: inxectar aos pacientes parte do material xenético do coronavirus, o que produce precisamente a súa coroa, que é a súa porta de entrada nas células. O organismo produce anticorpos que finalmente loitan contra o virus ao ter loitado previamente contra unha parte da súa estrutura.

O proxecto saíu adiante nun tempo récord. Moderna iniciou os estudos en canto China publicou o xenoma do SARS-CoV-2 o 10 de xaneiro de 2020. Centrouse na proteína S do virus (do inglés Spike, ou espiga), que sobresae da súa membrana para darlle aparencia de coroa ao observalo nun microscopio (de aí o nome de coronavirus). Esta é a proteína que o virus emprega a modo de gancho para amarrarse ás células ás que infectará. Por iso, os anticorpos que a neutralicen privarán ao virus da súa capacidade de infección.

Os investigadores de Moderna produciron as primeiras doses da vacina, formadas por moléculas de ARN coas instrucións para producir a proteína S, o 7 de febreiro. Cinco semanas máis tarde, o 16 de marzo, tras realizarse varias probas de seguridade, a vacina foi inoculada por primeira vez a unha persoa.

Ao tempo que anunciaba os avances na fase 3, a multinacional publicaba outro comunicado no que explicaba que a candidata a vacina é estable a temperaturas entre 2 e 8ºC nun refrixerador doméstico ou médico durante 30 días, un período que se estende a seis meses no caso de conservala a -20ºC. A refrixeración precisa para as doses é un dos puntos clave, toda vez que outros proxectos, como o de Pfizer, requiren por agora dunha conservación a temperaturas por baixo dos -60ºC.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.