Pfizer anuncia que a súa vacina ten unha efectividade do 90%

A carreira por unha vacina contra a Covid-19 viviu hoxe un novo fito co anuncio das farmacéuticas Pfizer e Biontech, que este luns comunicaron que a súa vacina contra o Covid-19 é “90% efectiva”. Así se pronunciaron tras coñecer os resultados da primeira análise intermedia do seu ensaio de fase 3, o último antes dunha solicitude de aprobación.

A eficacia da vacina mediuse comparando o número de participantes infectados co novo coronavirus no grupo que recibiu a vacina e no grupo placebo, “sete días despois da segunda dose” e 28 días despois da primeira, explicaron nun comunicado conxunto que adiantou a axencia AFP.

Publicidade

As probas desta candidata a vacina, que está baseada en ARNm, foron realizadas a un total de 43.538 participantes e a análise avaliou 94 casos confirmados de Covid-19 en participantes do ensaio.

As compañías advertiron que a eficacia final podería variar a medida que avance o estudo, segundo un comunicado conxunto. Ademais, engaden que nesta fase tres do estudo non se reportou ningún problema de seguridade.
“É un gran día para a ciencia. Un gran día para a humanidade”, asegurou Albert Bourla, presidente e CEO de Pfizer. “Os primeiros resultados do noso ensaio da vacina proporcionan a evidencia inicial da capacidade para previr Covid-19”, dixo.

Neste punto, celebrou que alcanzaron este “fito” no seu programa de desenvolvemento de vacinas nun momento no que o mundo “máis o necesita”, con taxas de infección que “establecen novos récords, hospitais que se achegan á súa capacidade excesiva e economías que loitan por reabrir”.

Bourla agradeceu ás miles de persoas que se ofreceron como voluntarias para participar no ensaio clínico, aos seus colaboradores académicos e investigadores nos sitios do estudo, así como aos seus colaboradores de todo o mundo “que están a dedicar o seu tempo a este esforzo crucial. Non poderiamos chegar tan lonxe sen o tremendo compromiso de todos os involucrados. Esta é unha vitoria para a innovación, a ciencia e un esforzo de colaboración global”, afirmou. As bolsas de valores en todo o mundo viviron fortes subas con este anuncio, en especial o índice norteamericano Dow Jones.

“Esta é unha vitoria para a innovación, a ciencia e un esforzo de colaboración global”

O ensaio clínico de fase 3 comezou o 27 de xullo e inscribiu a 43.538 participantes ata a data, 38.955 dos cales recibiron unha segunda dose da vacina candidata o 8 de novembro de 2020. O estudo tamén avaliará o potencial da vacina candidata para brindar protección contra o coronavirus naqueles que tiveron unha exposición previa, así como a prevención da vacina contra a enfermidade.

Ademais dos criterios de valoración principais de eficacia que avalían os casos confirmados de Covid-19 acumulados sete días despois da segunda dose, a análise final agora incluirá, coa aprobación da FDA, novos criterios de valoración secundarios que avalían a eficacia segundo os casos que se acumulan catorce días despois da segunda dose tamén.

Segundo as proxeccións actuais, a compañía espera producir a nivel mundial ata 50 millóns de doses de vacinas en 2020 e ata 1.300 millóns de doses en 2021. A vacina atopábase entre as candidatas máis prometedoras e ambas as farmacéuticas son as primeiras en mostrar datos exitosos dun ensaio clínico a grande escala dunha vacina contra o coronavirus.

Se os resultados se manteñen, ese nivel de protección acadado poñería a esta nova vacina ao nivel das vacinas infantís altamente efectivas para enfermidades como o sarampelo, segundo afirmaba hoxe o xornal estadounidense The New York Times.