A neuropediatra Anna Sans Fitó, experta en trastornos da aprendizaxe infantil e neurodesenvolvemento, conducirá nas vindeiras semanas un ciclo de encontros interactivos que se difundirán a través da canle Afundación TV, da Obra Social de ABANCA. As conferencias, nas que se pode participar de balde, previa inscrición nesta ligazón, abordarán os retos que a discalculia, o TDAH, os trastornos motores ou visoespaciais poden supoñer para as nenas e nenos nunha contorna que debe reforzar a súa atención cara a estas circunstancias.
Este xoves 12 de novembro, a partir das 19 horas, terá lugar o primeiro dos encontros, que continuarán os días 19 e 26. A cuarta sesión analizará a temática que concitase maior interese na elección que levarán a cabo os propios participantes. Estas conferencias enmárcanse no ciclo “Educación século XXI“, no que recoñecidos especialistas en materias vinculadas cos métodos de aprendizaxe ou a pedagoxía danse cita en Afundación para invitar a comprender novos contextos de transmisión do coñecemento.
Segundo explica a entidade nunha nota de prensa, “Afundación asume o desafío de converterse nunha canle de difusión daqueles trastornos da aprendizaxe que, por circunstancias ríxidas de certos contextos, se atopan menos priorizados”, co que “a Obra Social de ABANCA contribúe a cubrir un baleiro sobre unha cuestión fundamental para consolidar un modelo de ensino aberto e inclusivo, situando o foco do interese nestas temáticas”.
Anna Sans acumula unha longa experiencia no campo da neuropediatría, que a converteu nunha das referencias do seu campo en España. Combinou na súa traxectoria o labor asistencial coa docencia, sendo profesora de másteres e posgraos na Universitat de Barcelona, a Universitat Autònoma de Barcelona, ou a UVic. Dirixiu tamén xornadas e cursos de formación en diversos transtornos da aprendizaxe e neurolóxicos, colaborou co Departament d’Ensenyament da Generalitat de Barcelona na formación de docentes e na elaboración do protocolo de Atención TDAH nas escolas de Catalunya. É autora tamén de múltiples artigos científicos, capítulos de libro e poñente habitual nos congresos da especialidade. Na actualidade dirixe o Institut Som Via de Neurodesenvolvemento e Aprendizaxe, que centra o seu labor na potenciación das destrezas das nenas e nenos para identificar aqueles trastornos que poidan estar repercutindo nun menor ritmo de asentamento dos coñecementos.
A partir desta detección, e da participación activa de toda a comunidade educativa, o que inicialmente puido ser considerado como unha traba, convértese nun reto do cal a contorna aprende e se beneficia para favorecer o progreso social.
Máis información sobre o ciclo de conferencias de Anna Sans nesta ligazón.
