Galiciencia, a maior feira científica que se celebra na nosa comunidade, arrancou esta mañá no Parque Tecnolóxico de Galicia baixo o lema “Mellor, de Madeira” e prolongarase ata o venres. O seu obxectivo é espertar as vocacións científicas entre o alumnado de Primaria, Secundaria, Educación Especial, FP e Bacharelato. Desenvólvese en colaboración coa Consellería de Economía e Industria e a Fundación Española para a Ciencia e a Tecnoloxía (Fecyt). A feira vai reunir nas diferentes actividades programadas a máis de 5.400 participantes.
No encontro participan un total de 99 proxectos. Hai propostas moi variadas e de campos tan diversos como a agricultura, bioloxía, física e un longo etcétera, ademais da madeira, protagonista desta edición.
Entre os proxectos, atópase un sistema refrixerado para o traslado de órganos aos centros hospitalarios para a realización de transplantes, un dron autosuficiente para a localización de conatos de incendios, un sistema intelixente para o cuidado de plantas e un estudo sobre as aves nocturas do Courel, entre outros. Destacan tamén as propostas de carácter social como unhas gafas de realidade virtual para que as persoas con discapacidade auditiva poidan sentir a música, un método que emprega a intelixencia artificial para detectar TDAH nas aulas ou un peluche deseñado para calmar os ataques de ansiedade.
En relación coa madeira, un equipo presenta un adhesivo específico para este material; un estudo determina que tipo de madeira é a máis sostible para quentar os fogares; hai un proxecto de eco-casa; unha máquina recreativa; un piano xigante de chan; e xoguetes tradicionais de distintos países que empregan este material como materia prima, entre outras moitas ideas e proxectos.
Ademais do concurso, a feira compleméntase con actividades que buscan achegar a ciencia e a tecnoloxía aos máis novos de xeito práctico e divertido. O alumnado de Primaria e Educación Especial está a participar en dous talleres diferentes. Por un lado, na experiencia “Enredando coa madeira: da árbore ao cesto” a rapazada pode coñecer como a madeira é un material duro e resistente, pero en contacto coa auga abranda e vólvese maleable. Nesta liña, están a descubrir como esta propiedade tan asombrosa permitiu durante séculos aos tecer cestos, sombreiros e mesmo obras de arte, grazas aos recursos que nos dan as árbores.
Por outro lado, o taller “Harmonía coa madeira: cúpulas xeodésicas” céntrase nestas estruturas de gran beleza, cuxa simetría e regularidade resultan visualmente moi atractivas. O alumnado ten a oportunidade de comprobar como, aínda que se poden construír con diferentes materiais, a madeira é a que lles dá ese matiz harmónico. Así, están a gozar coa construción de pequenas cúpulas con pauciños e conectores impresos con tecnoloxía 3D a base de madeira, comprendendo dun xeito moi sinxelo a forza estrutural que achegan os triángulos.
Programa de radio
Os rapaces e rapazas de Secundaria e Bacharelato que expoñen os seus proxectos na feira tiveron esta mañá a ocasión de asistir e participar no programa “Efervesciencia” da Radio Galega, que conduce Manuel Vicente. No transcurso do mesmo contouse coa participación dos expertos e expertos no eido da madeira e co director do Parque Tecnolóxico de Galicia, Javier Taibo.
O espectáculo de ciencia poderá seguirse por ‘streaming’
Na xornada de mañá xoves, entre as 11:00 e as 12:00 horas, vaise celebrar un novo espectáculo de ciencia para alumnado de Secundaria, FP e Bacharelato. Poderá seguirse a través da canle de Youtube de Tecnópole.
Ademais, terá lugar a final do desafío científico “Atrévete coa Madeira!”, no que durante os últimos meses participaron equipos desde 4º de Primaria a Bacharelato de toda Galicia de xeito online.