Venres 29 Marzo 2024

Galicia vive o maior brote de sarampelo do século con 16 casos

Todos os positivos concéntranse en Pontevedra e Ferrol e están relacionados entre eles

Galicia rexistra o maior abrocho de sarampelo do século XXI, cun total de 16 casos, en dous focos repartidos entre as cidades de Pontevedra e Ferrol, e todos relacionados cun primeiro caso dun cidadán romanés ao que lle foi detectada a doenza na capital do Lérez.

Trece dos contaxiados deron positivo e outros tres están pendentes da contraanálise que se realiza no Centro Nacional de Microbioloxía en Madrid. O primeiro caso foi localizado en Pontevedra, nunha nena de nacionalidade romanesa que presentaba xa a característica erupción cutánea (exantema) propia da doenza. A investigación atopou logo a un adulto tamén romanés que se atopaba de paso en Galicia e que acudira ao centro de saúde en Pontevedra con ronchas e febre, aínda que non se lle fixo a proba do sarampelo. Como consecuencia disto, puido desprazarse libremente e espallar o virus, que é moi contaxioso.

Publicidade

O Sergas ten publicado instrucións moi precisas ante calquera sospeita de sarampelo, que inclúen comunicación urxente e realización de probas ante os síntomas de febre e exantema. Neste caso, non aconteceu así.

O 17 de xaneiro, Sanidade activou unha alerta sanitaria en Pontevedra. Tres novos casos de sarampelo foron notificados máis tarde. O 11 de febreiro apareceu o primeiro caso en Ferrol, tamén relacionado co mesmo abrocho.

O sarampelo volve a Galicia tras ser considerado erradicado

En total, ata hoxe hai 16 casos, dos cales 10 están en Pontevedra e 6 en Ferrol. O sarampelo é unha doenza moi contaxiosa. Estímase que cada paciente infectado pode transmitirlle a enfermidade a outras 18 persoas, cando por exemplo e coronavirus está entre dúas e tres.

O sarampelo considerábase unha doenza prácticamente erradicada en Europa, pero nos últimos anos están a aparecer novos abrochos, moitos deles relacionados cos movementos antivacinas, que contravñen a evidencia científica e provocan que haxa persoas sen vacinar. Actualmente, estímase que o 98,3 por cento dos galegos están inmunizados contra este virus.

No ano 2018, rexistrouse un récord de sarampelo en Europa, cun total de 82.596 casos declarados. Este é o maior abrocho de sarampelo en Galicia no que vai do século XXI. Anteriormente, houbera tres caos no ano 2001, e outros tres no 2002 e 2019. O brote máis importante ata o de agora foron os sete casos detectados no ano 2011. Agora, a cifra está en 16.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde

Identificado un novo campamento romano na fronteira entre Galicia e Portugal

Un equipo de arqueólogos detecta un posible recinto fortificado de tres hectáreas de extensión datado entre os séculos I a.C. e I d.C.