Os datos de hospitalizacións son os máximos da pandemia, e increméntanse tamén as cifras de falecidos nos últimos días.
Os datos de hospitalizacións son os máximos da pandemia, e increméntanse tamén as cifras de falecidos nos últimos días.

Galicia chega ao máximo de hospitalizacións por Covid-19 no día das novas restricións

Os 1.154 ingresos no día de onte, con case 20.000 casos activos, superan o récord da pandemia, que databa do 6 de abril de 2020

Con 19.768 casos activos, o que supón que arredor do 0,73% da poboación galega está agora mesmo baixo seguimento por Covid-19, o número de hospitalizacións por coronavirus acadou este luns o máximo da pandemia. As 161 persoas en coidados intensivos e as 993 noutras unidades, o que fai unha suma de 1154, supoñen un número superior ao do 6 de abril, no cumio da primeira onda, con 1106 hospitalizacións. O rexistro supérase no día no que a Xunta de Galicia anunciará novas medidas ante o avance da terceira onda, que causou no que vai de febreiro 216 falecementos, converténdose xa no terceiro peor mes despois de abril e novembro.

A cifra de hospitalizacións superará nos vindeiros días os máximos, xa que o diagnóstico de novas infeccións mantense de novo por riba dos 1.000. Engadíronse 1.402 novos casos á serie, e o Sergas informa de que entre as 18 horas do sábado e o domingo (cando se pecharon os datos difundidos o luns), se confirmaron 1.234 infeccións mediante PCR.

Os casos activos achéganse aos 20.000, practicamente duplicando as cifras da primeira onda de novembro. É probable que este indicador deixe de medrar tan rapidamente nos vindeiros días ao incorporarse as ‘curacións’ das persoas diagnosticadas a mediados de xaneiro, cando comezou a estourar esta terceira onda. Porén, tal e como adoita acontecer con estas enfermidades, é probable que unha parte deles requiran hospitalizacións e, nalgún caso, acaben falecendo.

A situación complícase tamén a escala municipal, xa que máis dun terzo dos concellos rexistra un mínimo de 40 casos nos últimos 14 días. A incidencia acumulada nalgúns dos municipios de maior tamaño podería levar a que se engadisen ás restricións vixentes en Xinzo de Limia, Arteixo ou Viveiro, onde se pechou toda a actividade non esencial e se prohibiron as reunións de persoas non conviventes.

Nun escenario semellante atópanse localidades como Poio, Cambre, Ponteareas, Verín, Betanzos, Sada, Tomiño, Fene, A Laracha, Salvaterra do Miño ou Silleda, con máis de 10.000 habitantes e cunha incidencia superior a 1.000. Porén, este non é o único indicador que terá en conta Sanidade para elevar as limitacións, xa que nalgúns casos esta incidencia cínguese, en parte, a centros sociosanitarios xa illados, entre outros factores. Consulta a táboa aquí.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.