A Xunta de Galicia anunciou na mañá deste martes o incremento do nivel de restricións en tres concellos (Arteixo, Xinzo de Limia e Viveiro), que superan a incidencia acumulada de 1.000 casos/100.000 habitantes nas últimas dúas semanas. A importante transmisión nestas vilas levou ao comité clínico a elevar a alerta e decretar o peche da hostalaría e a suspensión da actividade non esencial. A decisión supón un paso máis na escalada para conter a terceira onda, que xa supera notablemente en Galicia os datos da onda de outono.
O conselleiro de Sanidade, Julio García Comesaña, advertiu de que a situación era “preocupante”, o que levou a pedir “un esforzo adicional” a estes concellos especialmente afectados pola transmisión. Pola súa parte, a directora xeral de Saúde Pública, Carmen Durán, advertiu de que a decisión se toma tamén pola tendencia de novos casos. “Non tomamos as decisións por un dato illado de incidencia acumulada, senón tamén pola evolución”, advertiu Durán, que expuxo como a incidencia nos tres concellos afectados practicamente se duplicou na última semana.
Outros 112 concellos, tal e como avanzou o luns pola noite a consellería de Sanidade, sitúanse en nivel máximo, o que supón o peche perimetral, a prohibición de atender no interior dos locais de hostalaría e a redución ao 50% da capacidade das terrazas, ademais doutras medidas. O resto dos municipios quedan no nivel medio-alto, que tamén conleva o peche da hostalaría ás 18 horas, a prohibición de reunión de máis de catro persoas non conviventes e o confinamento nocturno ás 22 horas. As medidas entrarán en vigor na medianoite do mércores ao xoves despois da súa publicación no Diario Oficial de Galicia.
