Un tren de borrascas comeza a entrar este martes polo oeste de Galicia para deixar fortes choivas e refachos de vento por riba dos 100 km/h, nunha sucesión de frontes que xa activaron avisos amarelos e laranxas por Meteogalicia e pola Axencia Española de Meteoroloxía (Aemet).
Tras o longo o episodio de neve e frío das última semanas, a chegada do tren de borrascas atlánticas, a partir do serán do martes en Galicia, elevará notablemente as temperaturas e deixará choivas en case todo o país. A Aemet calcula que en 72 horas (mércores, xoves e venres) caerán de 120 a 150 litros de auga por metro cadrado no suroeste de Galicia, sobre todo na provincia de Pontevedra.
Hoxe cambia o tempo. A retirada do 🅰️ permitirá a chegada das borrascas. A #BorrascaChristoph, localizada ao norte de Escocia, terá unha baixa secundaria que traerá ventos fortes e chuvias ao oeste que se intensificarán e estenderán pola noite.⚠️⚠️https://t.co/795Ol1Dc28 pic.twitter.com/NTRcgGFBeh
— MeteoGalicia (@MeteoGalicia) January 19, 2021
Segundo a previsión de Meteogalicia, durante o martes Galicia irá perdendo a influencia do anticiclón, coa chegada dunha fronte moi activa cara á noite. As choivas serán especialmente intensas na metade oeste.
Ademais, Meteogalicia activou para este martes distintos niveis de aviso por fortes ventos na comunidade. O nivel será laranxa nas Rías Baixas e na Costa da Morte, onde se esperan refachos de forza 8 no mar, mentres que no resto da costa e en case todo o interior galego será amarelo. Na Mariña o aviso será amarelo.
Os avisos continuarán durante o mércores, cando serán laranxas na Costa da Morte e na Mariña lucense por fortes ventos por riba dos cen quilómetros por hora. Na meirande parte de Galicia o aviso será amarelo por choiva ao longo de toda a xornada.
Aquí podes consultar o boletín de avisos previsto por Meteogalicia
