Venres 29 Marzo 2024

O estudo do Sergas reduce a 30.000 as persoas expostas ao coronavirus en Galicia

Os datos preliminares da primeira ondada sitúan á comarca de Valdeorras coa maior prevalencia do SARS-CoV-2, que tivo unha especial incidencia en Ourense

A Consellería de Sanidade presentou este mércores os resultados preliminares do estudo de seroprevalencia que o Servizo Galego de Saúde (Sergas) realizou, coa colaboración do Instituto Galego de Estatística (IGE) para coñecer a circulación do coronavirus SARS-CoV-2 entre a poboación galega. A análise, que se nutre dun único test rápido realizado a 44.832 persoas, estima que o 1,15% (algo máis de 30.000 persoas) da poboación galega desenvolveu anticorpos fronte ao coronavirus. Son uns resultados que reducen practicamente á metade a previsión do estudo realizado polo Ministerio de Sanidad e o Instituto de Salud Carlos III, que apuntaban a un 2,15% da poboación nunha análise (tamén con datos provisionais, xa que o estudo está en marcha) realizada a unhas 6.000 persoas en Galicia a través de tests rápidos e, nos casos nos que se autorizase, a unha análise de sangue para reforzar as análises.

A baixa cifra de anticorpos específicos fronte ao SARS-CoV-2, que desenvolveron pouco máis de 1 de cada 100 habitantes de Galicia, constata segundo os responsables do Sergas a mínima circulación do virus no territorio, aínda que establece notables diferenzas entre as comarcas. “O valor é tan baixo que non se pode contar con ningunha protección derivada da inmunidade de grupo”, declarou o director xeral de Saúde Pública, Andrés Paz-Ares.

Publicidade

Das 44.832 probas realizadas, 385 deron positivo, aínda que se aplicou un axuste para corrixir os falsos negativos e ter en conta a sensibilidade da proba (menos ‘fiable’ nos primeiros días da infección, xa que detecta a resposta inmune do organismo en forma de anticorpos).

A área da A-52, con maior circulación

Os detalles da circulación do virus en Galicia foron presentados nunha comparecencia de prensa polo director xeral de Saúde Pública da Consellería de Sanidade, Andrés Paz-Ares Rodríguez, acompañado do director xeral de Asistencia Sanitaria do Sergas, Jorge Aboal Viñas, e do subdirector xeral de Información sobre Saúde e Epidemioloxía, Xurxo Hervada Vidal. Nas cifras achegadas polos responsables sanitarios salientáronse as diferenzas entre as áreas establecidas na enquisa: 38 comarcas ou agrupacións delas e os municipios das sete cidades.

Paz-Ares ofreceu o dato de que a comarca de Valdeorras é a que maior prevalencia acadou, co 3,35%, case o triple da media de Galicia. Esta maior incidencia podería gardar relación coa proximidade de Valdeorras á comarca do Bierzo. Segundo os datos abertos da Junta de Castilla y León, arredor de Ponferrada rexistráronse máis de 1.000 diagnósticos de coronavirus, e na área básica de saúde de Puente de Domingo Flórez, limítrofe con Valdeorras, un 2,9% da súa poboación foi diagnosticada de Covid-19 (ao que habería que engadir as infeccións non detectadas). Ademais, o director de Saúde Pública detallou a maior circulación do virus que se estende a través da entrada da A-52 desde a Meseta, nunha liña que vai desde O Sar ata Viana, Valdeorras, Trives, Caldelas, Allariz-Maceda, Ourense, O Carballiño e Tabeirós-Terra de Montes. Todas estas áreas superan o 1,5% de prevalencia.

Pola contra, o estudo non detectou ningún positivo na Terra de Soneira, e só 1 nas áreas da montaña de Lugo, A Mariña Central, Betanzos e Muros.

Mapa de positivos detectados por área (esquerda) e mapa de prevalencia en cada unha delas. Fonte: Consellería de Sanidade.
Mapa de positivos detectados por área (esquerda) e mapa de prevalencia en cada unha delas. Fonte: Consellería de Sanidade.

Por provincias, Ourense aparece, como xa acontecera co estudo do Ministerio, cunha maior circulación, que ascende ao 1,88%. Séguena Pontevedra (1,49), Lugo (0,79) e A Coruña (0,77). No tocante aos grandes concellos, Vigo é o que amosa maior circulación do virus (2,08%), seguida de Ourense (1,79), Pontevedra (1,24), Santiago (1,11), A Coruña (0,83), Lugo (0,61) e Ferrol (0,4).

Fonte: Consellería de Sanidade.
Fonte: Consellería de Sanidade.

Máis prevalencia nas persoas maiores

Os datos derívanse dunha proba rápida a través dunha punción dun dedo a cada participante, que debería cumprimentar ademais unha enquisa sobre os posibles síntomas da doenza desde o comezo da crise ou nos últimos 14 días, así como a situación laboral de cada persoa.

Neste aspecto, o estudo salienta unha notable diferenza nas persoas maiores de 65 anos, cun 1,64% de prevalencia, fronte ao 0,56% dos menores de 18. A medida que medra a idade, a taxa de incidencia tamén medra (agás un pequeno descenso na franxa de 40 a 49 anos.

Outra das conclusións do estudo é que a prevalencia de inmunes nas persoas que tiveron síntomas da enfermidade multiplica por catro á das persoas que non os tiveron (2,73% vs. 0,70%).

Segundo informou Sanidade, esta enquisa de seroprevalencia, que ten aínda pendente unha segunda ondada, “busca un triple obxectivo: estimar a prevalencia da inmunidade fronte ao Covid-19 nas diferentes localidades galegas, definir cal é a súa repercusión de acordo ás variables de sexo e idade, e, finalmente, monitorizar a evolución da epidemia durante o período de tempo en que se produza a recollida da información”.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un traballo da UDC sobre investigación básica en epilepsia gaña o Epiforward 2024

O equipo conseguiu reducir a actividade cerebral grazas á aplicación de campos magnéticos en áreas concretas do cerebro

Un bólido cruza a costa de Lugo ata caer no Cantábrico

A segunda bóla de lume visible dende Galicia en apenas dúas semanas procedía da chuvia de estrelas das delta-leónidas

Novos achados revelan o carácter funerario da ‘roda’ de Adai, un xacemento único en Galicia

A descuberta dunha ola que se conserva completa e de pé sobre unha lousa suxiren que servía para actos rituais fundacional

Científicos galegos participan no primeiro mapa español de bacterias resistentes aos antibióticos

A base de datos en liña proporciona o perfil xenómico de 461 cepas, procedentes de 41 hospitais situados en 13 rexións de España