Os disruptores endócrinos son substancias químicas capaces de alterar o sistema hormonal do organismo humano e xerar a súa disfunción, polo que poden chegar a causar diferentes enfermidades. Actúan como xenoestróxenos e atópanse en moitos produtos químicos industriais, incluíndo pesticidas e herbicidas, á parte de en cosméticos e outros artigos de consumo cotián.
Un novo estudo, publicado na revista Environmental Health Perspectives, revela a conexión entre estes contaminantes ambientais e o cancro de endometrio, un tipo de tumor que se desenvolve na cara interna do útero. Con máis de 5.000 novos casos en España ao ano, supón un gran impacto na saúde das mulleres.
Liderado polo IDIBELL, o Instituto Catalán de Oncoloxía, a Universidade de Granada e o Instituto de Investigación Biosanitaria de Granada, este traballo avaliou a carga hormonal total no sangue de máis de 300 mulleres, con e sen cancro de endometrio, mediante técnicas avanzadas de análise química e ensaios biolóxicos.
“O uso destes ensaios biolóxicos axuda a entender o impacto negativo das mesturas químicas”, afirma Marieta Fernández, catedrática da Universidade de Granada e investigadora principal da investigación. “É interesante que atopemos esta asociación con doses medias de xenoestróxenos, pero non con altas, de forma similar ao observado coas hormonas endóxenas”, explica Laura Costas, investigadora do IDIBELL e o Instituto Catalán de Oncoloxía e primeira autora.
Implicacións para a saúde pública
Esta investigación expón o impacto negativo dos disruptores endócrinos e, segundo os científicos, ten implicacións significativas para a saúde pública. Ademais, os resultados recalcan a necesidade de considerar o efecto combinado de mesturas químicas no momento da avaliación do risco ambiental.
“Esta relación seguramente está vinculada coa propia natureza do tumor, ao ser un cancro dependente de hormonas como é o de endometrio. Por iso, queremos analizar se a presenza de xenoestróxenos implicaría unha peor evolución da patoloxía naquelas mulleres que xa teñen a enfermidade”, conclúe Costas.
Referencia: Total Effective Xenoestrogen Burden in Serum Samples and Risk of Endometrial Cancer in the Spanish Screenwide Case-Control Study (Publicado en Environmental Health Perspectives)
