As galegas son as máis deprimidas de toda España: 599.100 mulleres presentan síntomas de depresión, dende graves ata leves. É dicir, un 44% do total. Así o indican os novos datos do informe do Instituto Nacional de Estadística (INE), cunha gran diferenza fronte aos homes (27,8%). En total, un de cada tres galegos (36,19%) teñen unha sintomatoloxía asociada á depresión.
As persoas máis maiores son as máis vulnerables, xa que o 66,38% das mulleres cunha idade superior aos 85 anos amosan estes síntomas. A cifra modérase nos homes: exhíbenos a metade deles (49,99%). O informe do INE tamén destaca que 368.900 galegos teñen rexistrados cadros depresivos, o 62,9% dos cales son mulleres. Do total, o 41,3% amosan un cadro depresivo maior. Estes poden ser algúns dos motivos polos que Galicia é das comunidades que máis consume antidepresivos.
O factor de xénero é moi importante nestes casos. A proporción de persoas con síntomas tende a aumentar co paso dos anos. Con todo, as mulleres de máis de 25 anos presentan máis indicios de depresión que calquera franxa de homes menor aos 74 anos.
A brecha de xénero, sempre presente
Á hora de considerar o seu estado de saúde, os galegos son os que peor a puntúan. Só seis de cada dez galegos (un 59,5%) valoran este como bo ou moi bo, bastante por debaixo da media española (74%). Tamén unha porcentaxe moi baixa de galegos cre que a súa saúde é moi boa: o 14,97%, que contrasta coa visión dos estremeños (34,41%) ou a dos ceutís (40,64%). Unha vez máis, as mulleres son as máis prexudicadas segundo a enquisa, e son as que perciben como peor a súa saúde, con só un 44,03% considerando boa ou moi boa a súa situación. Ademais, hai o triple de mulleres (3,39%) ca homes (1,01%) que consideran moi malo o seu estado de saúde.
En xeral, a brecha de xénero é moi elevada no ámbito da saúde mental. O 19,8% das mulleres ten ansiedade, fronte o 8,54% dos homes. Tamén o 17,34% das mulleres están diagnosticadas de depresión ante o 7,97% dos homes. Ademais, unha maior proporción de mulleres sofre migrañas (un 22,58%) que homes (9,01%).
O estrés laboral forma parte dos problemas que afectan a saúde. O 4,48% dos galegos exhiben síntomas vinculados ao traballo, sendo a cifra moderadamente maior nas mulleres (4,53%).
Menos consumo de alcohol
Con respecto aos hábitos saudables, as cifras melloran nalgúns aspectos. O 14,91% dos galegos fuma a diario, menos que a media española (16,6%). O 60,3% dos fumadores galegos son homes. O consumo de alcohol tamén é baixo, en comparación coa media nacional. O 41,32% dos galegos non consumiu estes produtos nos últimos 12 meses, sendo a cifra máis baixa despois de Cantabria (63,55%). Si que se supera a media na cantidade de veces que os galegos beberon de máis. Un 9,1% consumiu alcohol de forma intensiva no último mes, fronte ao 7,8% da media.
Galicia tamén se atopa na parte alta dos problemas de saúde vinculados á masa corporal. É a cuarta comunidade autónoma con máis taxa de persoas obesas (17,88%), por detrás de Canarias (20,64%), Murcia (20,12) e Castela-A Mancha (19,86%). Ademais, hai máis mulleres (19,15%) ca homes (16,49%). Iso si, ambos fan exercicio en proporcións similares. De media, pouco máis de un de cada catro (27,59%) é sedentario no seu tempo libre.
