En Galicia viven, segundo o padrón municipal de habitantes de xaneiro de 2020, máis de 870000 persoas maiores de 60 anos. Isto é, máis do 32% da poboación supera esta idade. Este factor condiciona, por tanto, a estratexia de vacinación que desenvolve a comunidade autónoma, o que permite tomar distintos camiños respecto a outras comunidades dentro do marco da estratexia estatal de inmunización contra a Covid-19. O presidente da Xunta de Galicia, Alberto Núñez Feijoo, achegou este xoves unha previsión que, de cumprirse, supoñería chegar á primeira gran meta para conter os casos máis graves e letais que causa a infección polo coronavirus SARS-CoV-2, xa que en Galicia o 96,5% das persoas falecidas tiñan 60 ou máis anos.
“Agardamos que esta semana o 29% da poboación diana xa teña, polo menos, a primeira dose da vacina”, expuxo Feijoo, segundo o avanzado o día anterior no Parlamento polo conselleiro de Sanidade, Julio García Comesaña. Isto supoñería que, antes do luns 19 de abril, unhas 685.130 persoas xa terían, canto menos, unha dose. O presidente autonomíco apuntou, ademais, que ” a pesar de todas as incertezas, estamos traballando coa hipótese de que no mes de xuño poidamos ter inmunizados, como mínimo coa primeira dose, a todos os maiores de 60 anos”, expuxo Feijoo. Engadiu que se trata dunha “estimación prudente” para conseguilo antes de “finais de xuño”, o que tería unha “repercusión enorme desde o punto de vista sanitario e tamén desde o punto de vista económico”. A vacinación destas 870.000 persoas maiores de 60 anos suporía, como mínimo, a inoculación da primeira dose a máis de 1,03 millóns de habitantes, xa que ata este mércores houbo máis de 160.000 persoas menores desta idade, e pertencentes a colectivos esenciais, que xa recibiron algunha das vacinas.
Na súa comparecencia, o presidente da Xunta achegou tamén outro dato, non facilitado nos informes diarios da Xunta, e que constata a protección que as vacinas están a ofrecer nos grupos prioritarios: nos últimos sete días, só o 3,5% dos novos casos son de maiores de 80 anos, o que se engade, ademais, aos máis de 25 días sen casos nas residencias de persoas maiores. Este cambio no perfil dos casos detectados está a repercutir de forma positiva no número de casos graves e falecementos, pero tamén amosa outra cara: desde o comezo da inmunización nas residencias e nos maiores de 80 anos, a porcentaxe de falecementos entre as persoas de 70 e 79 anos (das que só se inmunizou ao 1,6% ata este martes) está a medrar, ata acadar o 32% de todos os falecementos con diagnóstico de Covid-19.
Avance por grupos de idade
Ata o momento, alén da protección nas residencias de maiores, practicamente completada a mediados de febreiro, a vacinación avanza a maior velocidade nas persoas maiores de 80 anos. Ata o 14 de abril recibiran a primeira dose un 93,2%, e un 47,6% completaron a súa pauta. Ao serlle aplicada a fórmula de Pfizer-BioNTech ou Moderna, está previsto que nas vindeiras semanas todas as persoas cunha dose completen a súa pauta, o que supoñería a protección dunha gran maioría deste grupo prioritario. O seguinte esforzo centrarase no grupo de 70-79 anos, que está a avanzar a maior velocidade nos últimos días.
Este martes, Julio García Comesaña aclarou tamén que se está a desenvolver a vacinación a domicilio de grandes dependentes e a de maiores de 80 anos que, por diversos motivos, non puideron achegarse aos centros de saúde. E no caso dos colectivos de moi alto risco contemplados na estratexia de vacinación (pacientes con cancro, VIH, inmunodeficiencia primaria ou transplantados, entre outros) Sanidade vai utilizar 35000 doses de Moderna.
