Sabías que Castelao, ademais de político, escritor, médico, debuxante e un dos pais do nacionalismo galego, tamén fixo os seus intentos como actor? O rianxeiro ten un pequeno papel no filme de ficción máis antigo de Galicia, Miss Ledyia, rodada en 1916 por José Gil. Esta será a cinta que porá o foco sobre a comunidade na 45ª edición de Le giornate del Cinema Muto, festival de referencia mundial na difusión do cine mudo, onde o territorio será representado pola Filmoteca de Galicia. Para conmemorar a orixe do cine, o vindeiro 7 de outubro proxectarase a curtametraxe de 20 minutos no evento, celebrado na cidade italiana de Pordenone.
A película narra a chegada a Pontevedra da señorita Ledyia Katson e o seu tío millonario procedente de Estados Unidos, así como a súa estancia na Illa da Toxa. Alí é onde se atopan cos reis de Suavia, que están de incógnito e vense amenazados pola chegada dun anarquista, que pretende realizar un atentado. Esta é unha clara referencia ao atentado de Saraxevo que desencadeou a Primeira Guerra Mundial.
Pero, como aparece Alfonso Daniel Rodríguez Castelao? Ten un pequeno papel e interpreta un pastor protestante. A súa intervención, ademais da historia da cinta, faina unha das fitas atesouradas pola Filmoteca de Galicia, que actúa como principal centro garante da memoria audiovisual galega a través da preservación e difusión do patrimonio fílmico.
O papel de Galicia na xornada italiana
Miss Ledyia intégrase xunto a outras 62 obras cinematográficas dedicadas ás orixes do cine en España, consensuada entre todas as filmotecas participantes —como Filmoteca Valenciana, Arxiu del So i de la Imatge de Mallorca ou Euskadiko Filmategia/Filmoteca Vasca— coa fin de ofrecer un percorrido polo período comprendido entre 1896 e 1916 dende unha ampla perspectiva territorial e temática.
Na actualidade, a Filmoteca de Galicia conserva arredor de 15.500 copias de materiais cinematográficos (unhas 3.500 películas) e videográficos (máis de 12.000 fitas) con títulos que datan dende 1913. Ademais, garda unha ampla colección de carteis cinematográficos que acada as 11.000 unidades e un fondo fotográfico con máis de 60.000 rexistros.
