Acabou o Entroido e o tempo primaveral en Galicia. Após unhas xornadas con ceos despexados e temperaturas que rozaron os 20 graos de máximas nalgunhas zonas da comunidade, as chuvias volven este mércores para quedar. Unha profunda borrasca afectará ao territorio a partir do venres e deixará precipitacións intensas e fortes ventos. Por este motivo, acábase de activar unha alerta amarela por refachos que superarán os 80 km/h nas montañas lucenses e ourensás.
Durante este mércores e xoves Galicia mantense na influencia dun sistema de aire frío en altura. As nubes irán medrando ao longo do día e, durante as dúas próximas xornadas, “haberá chuvascos con treboada con maior probabilidade no interior e na metade sur da comunidade”, aseguran fontes de Meteogalicia. Pola súa banda, a Axencia Estatal de Meteoroloxía (Aemet) predí que os trebóns deste 5 de marzo terán lugar nos concellos das Rías Baixas de cara á noite.
Con respecto ao xoves, a inestabilidade atmosférica deixará chuvascos xeneralizados pola tarde e localmente treboentos. As temperaturas rozarán os 19 graos de máximas en Ourense, mentres que en zonas como Santiago non superarán os 15 graos. As mínimas ascenderán lixeiramente e os ventos de compoñente sur soprarán frouxos en xeral.
Alerta amerala por vento
De cara ao venres Galicia estará afectada por unha borrasca situada ao oeste do territorio. Segundo as predicións de Meteogalicia, a partir desta xornada agárdanse chuvias intensas na maior parte da comunidade, especialmente de cara á noite.
Os ventos soprarán forte no litoral e na montaña, superando os 80 km/h. Por este motivo a Aemet vén de activar unha alerta amarela por refachos nas comarcas ourensás de Valdeorras, Terra de Tribes e Viana e nas lucenses de Quiroga, Os Ancares e Fonsagrada. Tamén a Costa da Morte e as Rías Baixas están afectadas por este aviso.
Esta borrasca profunda, que aínda non ten nome asignado, deixará moita inestabilidade en Galicia de cara a fin de semana. As chuvias espallaranse por todo o territorio, “especialmente frecuentes no litoral atlántico e na metade sur”, acorde as predicións de Meteogalicia. Ademais a cota de neve estará nos 1.200 metros durante o día e baixará aos 1.000 na noite. Os termómetros baixarán e oscilarán entre os 14 graos de máximas e os 6 graos de mínimas.
