Temperaturas de primavera e litoral de inverno. Así se podería resumir a meteoroloxía que vivirá Galicia estes días. Unha profunda borrasca no Atlántico afectará ao mar de fondo polo que a Axencia Estatal Meteorolóxica (Aemet) vén de activar unha alerta amarela por ondas para este martes 18 e mércores 19. Os termómetros “por riba da media” rozarán os 20 graos durante as próximas xornadas nalgunhas cidades galegas.
Esta semana a meteoroloxía en terra e mar será moi diferente. Por unha banda, unha profunda borrasca no Atlántico afectará ao mar de fondo, que poderá crear ondas de entre catro e cinco metros de altura no litoral das provincias de Pontevedra e A Coruña. Por este motivo, a Aemet e MeteoGalicia veñen de activar un aviso amarelo para este martes 18 e mércores 19 de febreiro nas Rías Altas e Baixas. “Agárdase que para o xoves tamén poida existir alerta amarela, pero estas predicións só chegan a tres días”, indican fontes da axencia galega.
Temperaturas “por riba da media”
Malia que a borrasca do Atlántico ten asociada varias frontes preto de Galicia, non “chegarán a atravesar completamente a Comunidade” durante as próximas xornadas. Malia isto, na noite do martes ao mércores poderían caer algunhas lixeiras precipitacións nos concellos das Rías Baixas e no sur de Ourense, segundo indica Meteogalicia.
Hoxe teremos tempo seco, néboas matinais localmente persistentes e presencia de nubes de tipo medio e alto.
— MeteoGalicia (@MeteoGalicia) February 17, 2025
As borrascas, ao outro lado do Atlántico, xeran moita axitación no mar. Mañá o mar de fondo chegará a Galicia con ondas que superarán os 4 metros 🟡⚠️ pic.twitter.com/8KFdDETj3z
As temperaturas para estes días ascenderán durante este mesmo martes, deixando máximas que rozarán os 20 graos en Pontevedra ou Vigo. As mínimas para esta xornada oscilarán entre os 5 graos de Lugo e os 10 da Coruña. De cara ao mércores os termómetros manteranse semellantes, con 19 graos de máximas en Ourense, mentres que o resto das grandes cidades galegas estarán nos 17 graos.
A semana avanzará “con temperaturas moi estables en terra e por riba da media” debido a influencia dos ventos do sur que traen un aire cálido, segundo detallan dende Meteogalicia. A medio prazo, as probabilidades de chuvia aumentan ata o 90% en cidades como Vigo, Santiago ou Lugo debido a entrada doutra fronte atlántica.
