Unha táboa flamenga do século XVI da Virxe do Neno, Santa Ana e San Xosé, recuperada do tráfico ilícito, foi entregada ao Museo de Belas Artes da Coruña por parte do Ministerio de Cultura. Pero, como chegou a Galicia? A peza foi recuperada na Operación Altarpiece, desenvolvida xunto á Garda Civil e os Carabinieri italiano: atopáronse táboas renacentistas e creacións atribuídas a Amadeo Modigliani ou Brueghel procedentes dunha vila situada en Marbella (Málaga).
O percorrido dos bens continuou en Italia, ata onde foron exportados ilegalmente, sen os permisos necesarios —algún deles denegado anteriormente—, debido ao valor que tiñan para o patrimonio histórico español. Foron atopados en galerías de arte e domicilios particulares de diversas cidades italianas, ou noutros países a onde foran vendidos.
Dende o momento que son saídos do país sen autorización, estas obras de arte pasan a formar parte do patrimonio cultural do Estado. Desta forma, foron asignados polo Ministerio de Cultura a museos estatais situados en diferentes cidades, como é o caso da táboa flamenca ao museo coruñés. O destino da táboa, en moi bo estado de conservación e atribuída a un pintor flamengo anónimo, probablemente da escola de Amberes, foi adscrita ao Museo de Belas Artes da Coruña na 97ª reunión do Consello de Patrimonio Histórico, celebrada en Roma en outubro de 2025.
