Aumentar a rendibilidade das explotacións agrícolas e mellorar a biodiversidade do chan. Eses son os obxectivos marcados polo proxecto SoildiverAgro, que involucra a sete países europeos desde 2019 para analizar os cultivos de pataca, trigo e hortalizas en distintas rexións do vello continente para a extracción de ensinanzas que permitan optimizar a xestión dos solos.
Os resultados acadados foron presentados nunha xornada organizada pola Universidade de Vigo no Parador de Santo Estevo de Ribas de Sil, en Ourense. Alí, representantes da iniciativa na que participaron 22 socios de España, República Checa, Alemaña, Finlandia, Dinamarca, Bélxica e Estonia fixeron un repaso das leccións recollidas ao longo dos seis anos de vida do proxecto, que conta co apoio de Fundación Empresa Universidad Gallega (Feuga).
Ao longo deste tempo desenvolvéronse 17 estudos en seis rexións bioxeográficas distintas de Europa: Boreal, Nemoral, Atlántica Central, Continental, Mediterránea e Lusitana. Nestas zonas puxéronse en práctica traballos de campo sobre o cultivo sostible de patacas, trigo e hortalizas. A meta era comparar as diferenzas entre sistemas de monocultivo e os diversificados. Todo co horizonte final de extraer ensinanzas para incrementar a rendibilidade das plantacións e ofrecer solucións asentadas na ciencia a agricultores e outros actores implicados.
Intercambio de experiencias
Froito destes estudos, o proxecto creou unha comunidade de práctica para o intercambio de coñecementos e fomentar a conciencia sobre a biodiversidade como un factor “fundamental” na produtividade e a saúde dos solos. Tamén serviu para configurar unha serie de recomendacións políticas para as administracións de cara a adoptar decisións en base ás características do lugar.
Desde a súa posta en marcha en 2019 son xa 20 os artigos científicos publicados e 100 resumos prácticos que recollen as conclusións enfocadas á mellora da xestión dos cultivos. Entre elas inclúense unha plataforma web para optimizar os sistemas de cultivo de trigo e unha serie de vídeos cas prácticas máis axeitadas segundo a rexión.
