A poucos quilómetros da cidade de Vigo atópase un lugar no que o tempo parece moverse a outro ritmo. O Castelo de Soutomaior, unha fortaleza medieval cuxa orixe non está de todo clara, é xa de por si unha construción única capaz de facer viaxar no tempo a quen a visita. Con todo, ademais deste edificio impoñente, o que fai único este emprazamento son os xardíns que rodean o castelo, unha colección de especies botánicas entre as que destaca, pola súa beleza e historia, a camelia.
“Desde o ano 1982, o Castelo de Soutomaior forma parte de Deputación de Pontevedra e, cando se celebra o I Congreso Internacional da Camelia, pasamos a formar parte dese Xardín de Excelencia europeo”, conta Nava Castro, deputada de Turismo en Pontevedra. “Chegou aquí no século XIX desde Oriente, e acolleuse moi ben pola calidade do solo, especialmente nas Rías Baixas”, indica.
A camelia como símbolo
Desde entón, a camelia forma parte da flora galega, chegando a converterse nunha flor simbólica no sur de Galicia. Ademais da súa beleza, destaca por ter usos medicinais —coas súas follas poden facerse tés e cremas—, por ter sido utilizada en numerosas ocasións como inspiración artística, e por florecer en febreiro e marzo, fóra da temporada estival.
“Precisamente por iso, como agora estamos na floración plena, facemos estes meses distintas actividades relacionadas con ela”, explica Castro. “Son actividades combinadas: a camelia e a literatura, a camelia e a moda, a camelia e a saúde…”. A maiores, desde a Deputación tamén organizan actividades para nenos, como xogos, unha escape room, contacontos e talleres de pintura ao redor da camelia.
“Este lugar é espectacular. Percorrendo esta paraxe non só se poden ver camelias de todas as cores, senón que hai a maiores 18 árbores centenarias e moitas especies distintas”, comenta Castro. “É un lugar digno de admiración e que invita a reflexionar, fuxindo da velocidade do día a día”, conclúe.
👉 Consulta aquí a programación: https://www.castelodesoutomaior.com/gl/actividades
