A probabilidade de que un asteroide choque contra a Terra en 2032 é a maior xamais rexistrada en tempos modernos. A rocha espacial denominada 2024 YR4 aumentou o risco de impacto segundo os últimos datos da NASA. Detectado en decembro do pasado ano polo Sistema de última alerta de impacto terrestre de asteroides (ATLAS, polas súas siglas en inglés) en Chile, o obxecto pasou do 1,2% ata o 3,2% de posibilidades de chegar ao planeta. Pero os expertos indican que non hai que alarmarse.
A comunidade astronómica mundial segue de preto a evolución deste asteroide que ten “entre 40 e 90 metros de ancho“. Malia que a probabilidade de impacto contra a Terra vai en aumento, os expertos aseguran que a medida de que se vaian recollendo datos esta cifra irán baixando. Algo semellante ao que aconteceu en 2004 co asteroide Apophis, cun tamaño de máis de 30 metros, que, tras case chegar a un 3% de posibilidade de chocar contra o planeta en 2029, esta foi descartada en observacións posteriores.
Oito megatóns de TNT
O asteroide 2024 YR4 está clasificado nun nivel tres da escala de risco de impacto de Turín: “un encontro próximo que merece a atención de astrónomos e o público”, segundo o define a Axencia Estatal Europea. Debido ao seu tamaño e a velocidade que podería chegar a alcanzar estímase que, de chegar a impactar no planeta, destruiría unha cidade. De entrar na atmosfera terrestre, o escenario máis probable é a explosión no aire, o que significaría que explotaría cunha forza de oito megatóns de TNT, máis de 500 veces a potencia da bomba de Hiroshima, segundo detallan dende a Axencia SINC.
O corredor de impacto que barallan os expertos abarca o Pacífico oriental, o norte de Sudamérica, o Atlántico, Áfica, a Península Arábiga e o sur de Asia. Malia isto, dende a organización Planetary Society avisan de que é demasiado cedo para que a xente considere decisións tan drásticas como as de reubicación.
