Reunións cara a cara, colaboracións, unións estratéxicas… Unha representación do sector biotecnolóxico de Galicia, liderada pola Xunta e encabezada pola Axencia Galega de Innovación, xunto co Clúster Tecnolóxico Empresarial das Ciencias da Vida (Bioga), buscan reforzar a súa posición en BioSpain 2025, unha das citas de referencia do seu ámbito en Europa. Celebrada en Barcelona do 7 ao 9 de outubro, é o maior evento biotecnolóxico organizado pola Asociación Española de Bioempresas (AseBio) en Europa e un dos maiores do mundo en reunións cara a cara e por empresas participantes.
A delegación Galicia Bio, integrada por medio centenar de empresas e institucións e por unhas 100 persoas, presenta a Galicia como “polo de referencia en biotecnoloxía” e acompaña e dá visibilidade ás empresas e entidades que integran o ecosistema biotecnolóxico galego. “Acudimos a BioSpain 2025, onde están presentes os actores da biotecnoloxía no mundo, para mostrar o empuxe innovador da biorrexión galega nos últimos anos, analizar e explorar alianzas estratéxicas para os nosos proxectos innovadores e afianzar novas vías de negocio”, destaca o presidente de Bioga, José Manuel López Vilariño. A institución fomenta no evento que as empresas galegas establezan contactos con compañías do sector e institucións nacionais e internacionais.
Xenómica, CRISPR e inmunoterapias
Os creadores do evento organizaron 60 sesións que abordan os últimos avances en xenómica, edición xenética (CRISPR), terapias oncolóxicas e inmunoterapias, así como bioloxía sintética. Tamén explora o impacto da intelixencia artificial na investigación clínica, a biotecnoloxía aplicada á agricultura rexenerativa e o contexto de regulacións europeas en materia de novas técnicas xenómicas e a lexislación farmacéutica. “Os nosos socios son actores relevantes da presente revolución biotecnolóxica; e por iso estamos en foros como este onde se abordan os avances de vangarda no sector das ciencias, onde queremos ser protagonistas e que nos permitirán seguir crecendo”, destaca o presidente de Bioga.
Á feira acudiu unha delegación institucional baixo a marca Galicia Bio, que está integrada pola Xunta de Galicia, Axencia Galega de Innovación, Axencia de Coñecemento en Saúde (ACIS), Sergas, XesGalicia, Bioga, Clúster Saúde de Galicia (CSG), VIRATEC e as tres universidades galegas. Tamén os seus centros de investigación e fundacións asociadas (CINBIO, CIQUS, CIMUS e Fundación Kaertor), e as tres fundacións biomédicas: Fundación Galega de Investigación Sanitaria de Santiago de Compostela (IDIS), Fundación Galega de Investigación Biomédica da Coruña (INIBIC) e a Fundación Galega de Investigación Biomédica Galicia Sur.
Galicia Bio
A delegación biotecnolóxica galega está presente no pavillón de Galicia Bio, onde están representados os socios do Clúster Tecnolóxico Empresarial das Ciencias da Vida. Dentro da delegación están as compañías TEMPOS, Unirisco, LiberaBio, Albor Biotech, ElectroGalicia, UN-EM, Iteria Biopharma, Bahia Software, Pib Group Iberia, Gradiant, Batea Oncology, VivoArchitect, CETIM Technological Centre, ANFACO-CYTMA, Nowture, Syspro Automation, Diversa Technologies, GalChimia, Linknovate e Science & Innovation Link Office (SILO), DIH DATAlife e Biopolo Sionlla. Tamén acudirán representantes de empresas socias de Bioga como Mestrelab Research, Biostatech, LincBiotech, Herrero&Asociados, Biorepos, Bflow, Zendal, CEAMSA, AMSlab, AYMING, Inbistra e AINIA, entre outras.
BioSpain é un dos congresos líderes en Europa. Este ano reúne a máis de 2.200 asistentes de case 1.000 empresas de 34 países e están previstas máis de 5.000 reunións individuais. A edición deste ano céntrase no papel do sector biotecnolóxico como impulsor do novo modelo sanitario e a súa posición como un elemento clave para lograr autonomía estratéxica de España e Europa en áreas como a economía, a saúde, a alimentación sostible e a transición industrial verde. O obxectivo é impulsar a innovación, o investimento, a colaboración e as novas oportunidades de negocio.
