Dende a travesía polo Atlántico da enfermeira galega Isabel Zendal ata os mitos que rodean a menopausa. Estes son algúns dos contidos que centran as pezas audiovisuais que lanzará GCiencia dende este mércores 28 de outubro ata finais de novembro para divulgar sobre ciencia e igualdade. O proxecto, en colaboración co Concello de Pontevedra, crea contido específico para redes sociais —nomeadamente Instagram e Tiktok— centrado nas sinxerxías entre multiculturalidade, ciencia e feminismo. O obxectivo é poñer en valor referentes científicos na loita contra o racismo e a favor da igualdade de xénero, e lograr implicar a mocidade no debate sobre ciencia e dereitos humanos.
O proxecto Pontevedra Multicultural. Ciencia pola igualdade —desenvolvido o pasado novembro de xeito presencial— parte da premisa de que a ciencia non só serve para entender o noso ADN, senón que tamén funciona como unha ferramenta de denuncia fronte ás inxustizas históricas. Así, os contidos audiovisuais abordarán, entre outros temas, os nesgos de xénero que aínda persistentes na investigación científica e nos ensaios clínicos, e centrará a súa atención nos grandes fitos de científicas racializadas como Alice Ball, Betty Harris e Gladys West, así como as inestimables achegas ao feminismo e á ciencia doutras figuras galegas, como a astronóma Antonia Ferrín.
Multiculturalismo e perspectiva feminista
Os sete vídeos lanzaranse nas plataformas de Instagram e TikTok de GCiencia e do Concello pontevedrés co obxectivo de fomentar un debate rigoroso sobre multiculturalismo, perspectiva feminista e cohesión social. O proxecto, coordinado pola xornalista de GCiencia Laura Filloy, busca transformar o rigor académico e a divulgación próxima a través dunha linguaxe coloquial que a aproxime ao seu público obxectivo a través de infografías, creatividades e imaxes sobreimpresionadas. A iniciativa quere poñer sobre a mesa o debate arredor dos retos actuais do racismo e da xenofobia, impulsar a participación da mocidade nun diálogo informado e plurar e analizar casos históricos de discriminación por raza e xénero na ciencia.
A serie de vídeos, elaborados polo equipo de xornalistas de GCiencia, respectarán o ton divulgativo característico deste medio, considerado en 2019 o Mellor Novo Medio de Divulgación do Estado polo xurado dos premios Prismas, o máis importante dos que se reparte no campo da difusión da cultura científica en España. Con ata 5,5 millóns de visitas mensuais, GCiencia é o primeiro dixital galego en redes sociais e conta con outros galardóns como o Premio da Crítica de Galicia ou o Rosalía de Castro da Deputación da Coruña.
