A poboación galega é das que máis se emborrachou ata a intoxicación nos últimos doce meses. O Ministerio de Sanidade vén de publicar a Enquisa sobre Alcohol e outras Drogas en España (EDADES 2024) na que reflicte o consumo destas substancias na sociedade, onde Galicia supera a media nacional en intoxicacións etílicas agudas e no consumo de cánnabis.
O informe, que se realiza cada dous anos, amosa os datos da evolución das prevalencias no consumo de alcohol, tabaco, hiposedantes, opiáceos e drogas psicoactivas no comercio ilegal, tanto a nivel autonómico como de xeito xeral en España. Comeza indicando as idades medias dos inicios da toma, estando en 16,7 anos o de fumar en Galicia, que sube a 18,7 se se trata de xeito diaria. Así mesmo, o comezo da inxestión de bebidas alcohólicas na rapazada galega prodúcese de media nos 16,5 anos e o consumo de cánnabis aos 18,5.
Máis borracheiras nos últimos 12 meses
Con respecto á toma de bebidas alcohólicas en Galicia, o EDADES reflicte que a prevalencia entre a poboación de 15 a 64 anos é dun 76,9% nos últimos 12 meses, dato que cae ata o 61,7% se se trata dos últimos 30 días. Destes casos, son os homes os que máis realizan esta acción, sendo a prevalencia dun 83,6% e 69,9%, respectivamente.
Pola contra, chama a atención que as intoxicacións etílicas agudas (borracheiras) nos últimos 12 meses en Galicia estean por riba da media nacional. Un 19,6% da poboación galega admite este feito, fronte ao 14,7% dos españois.
Máis galegas fumando cánnabis
Malia isto, no que respecta ao consumo de tabaco, o territorio galego está lixeiramente por debaixo da media nacional. A prevalencia de Galicia nos últimos 12 meses é dun 35,3%, mentres que en España é dun 36,8%. De xeito diario, fano o 25,2%, só 6 décimas por debaixo da española.
En relación ao cánnabis, Galicia supera lixeiramente a media de consumo desta substancia, sendo a súa prevalencia dun 13%, catro décimas por riba do dato nacional. Sobre este dato, chama a atención a prevalencia comparativa por sexos. De media, o 11,7% das galegas admiten fumar cánnabis, fronte ao 9,2% de España.
Menos fumadores
Esta enquisa do Ministerio de Sanidade vén a destacar o descenso notable do consumo de tabaco ocasional na poboación española, que diminuíu en tres puntos porcentuais con respecto a 2022. Vese así como a toma desta substancia descende en España, dentro dun contexto europeo no que a Comisión vén de recomendar aos países da UE que prohiban fumar nos espazos ao aire libre, como as terrazas, as paradas de autobuses, exteriores de zonas de traballo ou hospitais, entre outras.
Pola contra, tanto o tabaco como o alcohol seguen a ser as máis consumidas en España, coa segunda mantendo unha prevalencia do 76,5% da poboación. Entre as razóns que dá a poboación sobre o porqué da inxestión desta substancia destacan “por diversión e anima as festas”, porque “gústalle como se sente despois de beber” e porque “cren que é saudable ou forma parte dunha alimentación equilibrada”.
