Unha chuvia sen tregua e refachos de máis de 80 km/h. Estes serán os protagonistas climatolóxicos de Galicia durante esta fin de semana. Unha profunda borrasca atlántica de alto impacto deixará a partir deste venres persistentes precipitacións, fortes ventos e neve na comunidade. Debido a esta predición, Meteogalicia vén de ampliar o aviso amarelo no litoral e nas montañas galegas.
Esta profunda borrasca, que en caso de ser “bautizada” pola Axencia Estatal de Meteoroloxía (Aemet) recibiría o nome de ‘Jana’, comezará a afectar a Galicia este venres. Será a través dunha fronte activa, segundo detalla Meteogalicia, que deixará chuvias intensas en todo o territorio durante o avance da tarde. Ademais, agárdanse fortes ventos de compoñente sur, máis potentes no litoral e nas zonas altas. Por este motivo, para esta xornada están activadas tres alertas amarelas.
Alertas amarelas para esta finde
A primeira delas é por refachos que poderán superar os 80 km/h. As zonas afectadas, segundo indica Meteogalicia, serán: o oeste e suroeste da Coruña, a montaña de Lugo e Ourense e o litoral de Pontevedra. Tamén haberá aviso por ventos no mar, procedente do sur, e que alcanzará forza 7 —con intervalos de 8, que poderían superar os 60 km/h— afectando sobre todo ás Rías Baixas e a Costa da Morte. A última das alertas para esta xornada do 07 de marzo é por ondas de máis de catro metros de altura na costa oeste da Coruña.
Hoxe, chuvascos máis activos ao oeste, localmente tormentosos.
— MeteoGalicia (@MeteoGalicia) March 6, 2025
A partir do venres aproxímanse a #Galicia as borrascas e o aire frío⚠️ Teremos tempo invernal, con chuvias persistentes, ventos con intervalos fortes e dende o sábado, temperaturas baixas, con neve nas zonas altas. pic.twitter.com/UAoPJwflFS
Xa para o propio día do 8M as alertas por fortes refachos continúan para as montañas de Lugo e Ourense e súmaselle o interior de Pontevedra. Ademais, o vento no mar manterase en forza 7 con internvalos de 8 nas Rías Baixas e na Costa da Morte e as ondas nestas zonas poderán superar os catro metros.
Por outra banda, acorde á predición da Aemet, os chuvascos para esta xornada terán caracter treboento en todo o territorio conforme avance a tarde. Ademais, prevese que poida nevar nas zonas altas de montaña durante todo o sábado e parte do domingo.
