O día a día no laboratorio que dirixen os investigadores Jesús Varela e Carlos Sáa non dista moito de calquera outro centrado na química orgánica. O seu estudo está centrado na catálise organometálica, un proceso químico fundamental para a fabricación de obxectos que se empregan na vida cotiá: dende os fármacos que consomes ata os aparellos electrónicos que utilizas. En palabras de Jesús Varela, é como escalar unha montaña: podes facelo da maneira tradicional, subindo ata o cumio e baixando polo outro lado; ou escavar un túnel para chegar de forma máis directa ao teu destino. Hai que ver cal das dúas opcións é máis eficiente e sostible, de igual modo que o é a catálise organometálica.
Falamos co investigador Jesús Varela, do Centro Singular de Investigación en Química Biolóxica e Materiais Moleculares (CiQUS), vinculado á Universidade de Santiago (USC), no podcast de GCiencia en colaboración coa entidade compostelá. Con el debullamos os segredos dun proceso fundamental na túa vida diaria.
Escoita O podcast de GCiencia en todas as nosas plataformas de podcast: Spreaker, Spotify, Ivoox, iHeart, Deezer, Podcast Addict, JioSaavn e Podchaser
