O leite de lúa localizado na sima Aradelas é o primeiro que se atopa en Galicia? A polémica está servida. Trala publicación realizada a pasada semana sobre este achado espeleolóxico en 2024, diversas voces apuntan a que o traballo realizado polo equipo Geoceanic na Buraca das Choias dende 2017 foi pioneiro en atopar estes singulares depósitos de minerais na comunidade.
Sobre este proxecto que explora o “tesouro inundado do Courel” publicouse o libro A Buraca das Choias. Acceso ás entrañas do Courel, escrito por Sonia García. Nel plásmase a “crónica dunha xesta espeleolóxica” realizada polos expertos e submarinistas de Geocenic na cova lucense. Ademais de textos explicativos e testemuños dos protagonistas, a obra tamén expón perfís topográficos e fotografías en cor sobre os descubrimentos realizados durante anos de exploracións. A súa autora defende que é neste lugar onde “está rexistrada unha coada impresionante de leite de lúa dende hai moito”.
Descubrimento científico
Pola contra, dende o Xeoparque Montañas do Courel —promotor da investigación na sima Aradelas— expoñen que “o achado de leite de lúa é ante todo un descubrimento científico que debe ser apoiado con análises químicas e mineralóxicas. Mentres tanto, unicamente se pode realizar hipóteses que, aínda que válidas, deben ser confirmadas en evidencias científicas”.
Deste xeito, rebaten o argumento da Buraca das Choias asegurando que as masas brancas que se poden apreciar no libro e nos vídeos de Youtube publicados poden ser algún tipo de espeleotema tipo colada e non moonmilk, debido a “aparente dureza e carácter macrocristalino” das mesmas, detallan, aínda que admiten que non existe ningunha conclusión definitiva. Segundo indican os expertos, “a leite de lúa é un depósito plástico non consolidade con aspecto de pasta, crema ou xel, modelable coa man” e nos documentos mencionados “mesmo se recoñecen espeleólogos camiñando sobre as devanditas masas sen deixar pegadas afundidas“.
Tamén ofrecen “colaborar no estudo mineralóxico das masas brancas interpretadas como moonmilk na cova” e comprométese a actuar en consecuencia dos resultados destes estudos, “mantendo a postura reflectida ata o de agora ou, en caso contrario, rectificándoa publicamente“. Malia isto, dende a entidade consideran “enormemente positivas as exploracións espeleolóxicas levadas a cabo na Buraca das Choias durante os últimos anos, así como o gran labor de difusión dos seus protagonistas”, conclúen.
