Encontro científico sobre a velutina en Santiago

Investigadores e apicultores comparten visións e coñecemento nunha xornada que se celebra este mércores pola mañá en Santiago

O Consello da Cultura Galega, xunto á Academia de Ciencias Veterinarias de Galicia (ACVG), organiza este mércores 3 de abril, unha xornada sobre a importancia dos avances científicos na urxente cuestión da Vespa velutina, tamén coñecida como “avespa asiática”. Para asistir é preciso formalizar a inscrición no portal habilitado para a xornada (ver ligazón).

O encontro, no que participarán diversos expertos e expertas, pretende ser un espazo común entre os distintos sectores implicados: o ámbito da investigación científica, os apicultores e os demais axentes involucrados na loita contra a velutina. Deste xeito, respostaranse de forma autorizada e matizada as principais cuestións relacionadas co equilibrio do ecosistema e a mobilidade das pragas.

Neste sentido falará Luis Rodríguez Lado, doutor en Bioloxía e xerente do portal GEOFORSK. Lado pretende extender o ámbito de traballo da intelixencia artificial á da distribución de pragas no espazo e no tempo, de maneira que se poidan monitorar da man da plataforma VeluMap.

Programa do encontro

O encontro inaugurarase ás 09.45h, e ás 10.15 horas será o turno de Luis Rodríguez Lado con VeluMap. Ás 11.00 horas, Xesús Feás, Académico da ACVG, explicará a necesidade de avances científicos para loitar contra a velutina.

Para rematar, ás 12.00 horas comezará unha mesa redonda moderada por Antonio Crespo, presidente da AGAG. Nela participarán Xesús Feás e dous representantes da Asociación Galega de Apicultura (AGA), Xesús Asorey Martínez e Mª Esther Ordóñez Dios.

Investigación

Aínda que son moitas as solucións tentadas para combater á vespa velutina, a práctica máis extendida é o trampeo masivo. Sen embargo, este remedio está cuestionado desde algúns sectores, e parece estar lonxe de poñer punto e final á especie invasora. Ademais, segundo o estudo realizado por investigadoras de Vigo publicado na revista Apidologie, o 99% de insectos que quedaron atrapados nas trampas da investigación non eran velutinas.

As preguntas incómodas da ciencia sobre a velutina

É certo que a propagación da Vespa velutina causa estragos na apicultura e afecta á vida das abellas, coa consecuente alteración do ecosistema. Pero ata que punto o remedio pode ser peor que a enfermidade? Onde se atopa a solución óptima en termos de sustentabilidade? Cara a onde se desprazarán as pragas de velutinas? Mañá tentaranse resolver estas e máis dúbidas durante o encontro. Pode consultarse o programa aquí.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.