A terceira sesión de Ciencia en Feminino chega cunha charla coa matemática Elena Vázquez Abal. O ciclo de charlas e mesas redondas de GCiencia en colaboración coa Deputación de Pontevedra co gallo do 8M. Así, falamos coa catedrática da Universidade de Santiago de Compostela (USC) e galardoada por unanimidade co Premio de Divulgación Científica 2024 da súa experiencia como muller nun ámbito masculinizado como as matemáticas, da situación da muller e a nena na ciencia, e do camiño que aínda queda por percorrer para facer da ciencia un espazo máis inclusivo.
O ciclo de Ciencia en Feminino chega ao seu fin. Pecharase o día 25 da man das investigadoras Soledad Torres, Iria Gómez e Ainara Díaz, coas que se abordarán os principais obstáculos da carreira investigadora para as mulleres.
