A prestixiosa casa de antigüidades Ansorena sacará a poxa no mes de maio un lote composto por dous torques e un brazalete de ouro da cultura castrexa, procedentes dunha colección privada de Galicia. O prezo de saída destas pezas, datadas entre os séculos V e I a.C., será de 195.000 euros.
O conxunto inclúe dous torques dos séculos III-I a.C., pertencentes á Idade do Ferro, están formados por unha vara lisa e maciza de sección cadrada e perfil romboidal, con arestas ben marcadas e extremos rematados en forma de dobre escocia. O máis pequeno, cunha altura de 12,10 centímetros e un eixo horizontal de 15,10 centímetros, é tamén o máis pesado, con 368 gramos. Pola súa banda, o outro torque, de 14 centímetros de altura, alcanza os 347 gramos. A venda complétase cun brazalete laminar de ouro da Idade do Bronce, datado a finais do século I a.C., cun peso de 45,29 gramos.
Este caso súmase ao doutros achados de torques en Galicia, como os localizados nunha finca de Betanzos. Segundo expertos do Instituto de Ciencias do Patrimonio (INCIPIT-CSIC), estas pezas puideron empregarse como ofrendas en rituais relixiosos. Neste sentido, o arqueólogo Xosé Lois Armada sinala que non é estraño atopar ouro de maneira fortuíta nas proximidades dos castros, aínda que se descoñece o lugar exacto onde foron achados estes torques en territorio galego.
